Jerianne Tiel, studiante di Facultad di Ley:
ORANJESTAD (AAN) – Jerianne Tiel, studiante di e Facultad di Ley na Universidad di Aruba, den entrevista cu DIARIO a comenta pakico t’asina importante pa conoce kico e contenido di nos Leynan na Aruba ta.
Jerianne ta un di e studiantenan cu ta atende cu Tienda di Ley. E ta haya cu e estudio di Ley ta sumamente interesante y na Universidad nan ta siñ’e den termino general den tur su aspectonan, pero e tin su specialisacionnan tambe.
E mes, te ainda no a dicidi den ki ramo di Ley e ta bay specializa. El a reitera cu Tienda di Ley ta yuda publico na Aruba cu advies, e aña aki nan ta bay organiza sesionnan di informacion na diferente Centro di Bario.
“Hecho ta cu Tienda di Ley a wordo haci un vak e aña aki, y studiantenan cu ta doemee cu Tienda di Ley, ta haya puntonan pa esaki y parti di e curriculum, Dus, fuera di duna conseho na comunidad cu tin preguntanan huridico, ta cu nos ta bay duna sesionnan di informacion tambe den e centronan di Bario”, Jerianne Tiel a relata.
Jerianne ta un profesional caba, pero e ta sigui studia y su conseho ta pa otro personanan pa nunca stop di studia.
“E ta un challenge hopi grandi. Mi trabao tambe ta exigi hopi di mi, y ami ta haciendo mi estudio full time tambe, e no ta pa tur hende, pero Universidad tin orario atardi tambe pues, e ta pa combina trabao cu estudio. Hopi hende ta pensa y mi mes a kere tambe cu ta imposibel pa combina trabao cu estudio, pero mi a dicidi di asumi esaki y e no por ta mas contento di a dun e stap aki y haci e estudio aki”, Jerianne a expresa.
Estudio di Ley no ta e estudio mas facil cu tin, e ta rekeri di hopi esfuerzo y perseverancia, pero cuater aña ta pasa hopi lihe. Jurianne ta invita tur persona cu tin preguntanan huridico pa haci, y cu no tin e posibilidad di paga un abogado, pa probecha e sesionnan aki. E ta un situacion unda tur dos ta gana, e publico ta hay e advies huridico y e studiantenan ta deal cu casonan cu dificil pa un hende.
