ORANJESTAD (AAN) – Parlamentario Shailiny Tromp-Lee, den conferencia di prensa di fraccion di MEP, a menciona cu e presupuesto supletorio a wordo trata Diaranzon di e siman aki, den Parlamento,
pero a referi solamente na e hecho cu e cifranan ta alentador y e pronostico ta miho cu na Mei ultimo, basa riba locual gobierno ta premira desde October cu a pasa y a subraya cu Aruba ta den recuperacion.
No obstante, Shailiny Tromp-Lee a enfoca mas tanto, riba e dos reunionnan publico cu a tuma lugar den Parlamento, Dialuna cu Diamars cu a pasa.
E parlamentario a bisa cu e tema di WEB-LNG y sigur e trayectoria cu ta bay entama awo na Aruba, a trece hopi conmocion. “Ami mes, como parlamentario, ta un tiki indigna cu e direccion cu oposicion a bin ta atende cu e topico aki” Tromp-Lee a expresa.
Esaki pasobra gobierno a purba na “meet” nan preocupacion pa nan haya contestacion y hasta a yama un reunion publico unda cu a trece expertonan den sala, na unda por a haya aclaracion, tende for di boca di esnan encarga cu e proceso, kico tur a tuma lugar.
E parlamentario ta lamenta cu durante e reunion publico aki, no tabata tin preguntanan specifico, tur e falta di transparencia cu nan tabata enfatiza riba dje, nan no a haci uso di e reunion pa a puntra esnan cu a delibera, of esnan cu a firma e acuerdo, cu contenidonan real, preguntanan specifico y a keda enfatiza cu nan falta di informacion, y cu gobierno no ta transparente.
Tromp-Lee ta haya cu tin dos aspecto remarcable: uno, cu gobierno ta contesta pregunta, pero oposicion no kier e contestanan aki, y kier keda fomenta e hecho cu e proceso no tabata transparente.
Nan ta cuestiona e proceso, pero loke e parlamentario ta considera un falta hopi grandi, ta cu despues cu nan a haya e informacion cu parlamentarionan di MEP tambe ta haya, nan ta sigui cuestiona e profesionalnan cu a dirigi y a culmina e proceso aki, cu e contrato por a keda firma.
E ta kere cu pueblo mester ta conciente y tuma tempo pa scucha e preguntanan cu a keda haci durante di e reunion, anto puntra si enberdad oposicion tabata kier claridad, si enberdad oposicion no ta na haltura di e desaroyonan, puntra bo mes kico ta e meta di nan actuacion.
Tromp-Lee ta kere cu e lo ta mas cu duidelijk cu e meta di oposicion tabata cu nan a pensa cu nan lo por a hunga un influencia riba e coalicion, y cu nan a premira cu nan lo logra y cu Gabinete Wever-Croes-2 lo a bin den un situacion hopi delicado y cu hasta lo por a bay cas.
