Metodo WhizzArt ta dirigi riba orientacion riba mundo y educacion di arte

ORANJESTAD (AAN): Diahuebs mainta, Minister Endy Croes hunto cu Prome Minister Evelyn Wever-Croes a bishita na Prinses Amalia Kleuterschool.

E alumnonan di Grupo Dori y Grupo Barbulet a prepara un presentacion pa cu e proyecto Scol Arubano Multilengual ‘SAM’.

Prinses Amalia Kleuterschool ta e scol piloto cu e proyecto aki for di aña 2019.

E alumnonan a clausura nan tema di Whizz-Art cu un presentacion chikito den ambos klas.

WhizzArt ta un metodo cu ta incorpora desaroyo general di kleuter, Desaroyo Creativo y 21e Century Skills. Temanan ta cera cu presentacion chikito unda e muchanan ta mustra kiko a haci y siña den cuadra di e tema.

   A traves di canto y arte e muchanan a duna un presentacion tocante amistad, respet, aceptacion y tolerancia. Impresionante pa mira con avansa e muchanan aki ta, siñando den varios idioma, door di tende y train letra, figura di number y siñanan presenta dilanti otro hende. Remarcabel tabata cu e alumnonan a haci nan presentacion dilanti un publico chikito mustrando e confiansa pa ta sigur den nan klasnan.

   Minister di Enseñansa y Deporte Endy Croes a expresa cu e la keda impresiona pa mira con e programa di WhizzArt ta traha. Alabes ta gradici e cabesante di Prinses Amalia sra. Roelien Hofman y maestranan pa e invitacion. Minister Endy Croes ta felicita e dos klasnan di kleuter cu duna un bunita presentacion.