Metabolic Foundation satisfecho cu nan proyecto Surfside Science

ORANJESTAD (AAN): Diamars mainta DIARIO a entrevista miembronan di Metabolic Foundation, relaciona cu nan proyecto pa midi y monitor medio ambiente.

Suyin Ridderstaat a splica cu e fundacion ta haci proyectonan entre otro cu tin di haber cu ciencia di oceano, manera nan a haci cu Surfside Science.

“Nos a bin cu metodonan replicable y tambe pagable pa asina nos por cuminza colecta data na Aruba y esey nos a haci e aña cu a pasa”, segun Ridderstaat.

El a splica cu a uza metodonan special pa midi calidad di awa, di aire y di fondo di laman.

Metabolic Foundation a midi tambe cuanto vegetacion tin banda di laman.

Tur esaki a wordo haci solamente pa e area di Surfside  beach.

A scoge e beach aki pa test tur metodo, aparato y sensor, pa despues haci esaki otro camindanan tambe.

“E aña aki nos enfoke tabata mas pa desaroya e metodonan y e sensornan”, segun Ridderstaat.

Pa loke ta e sensornan y otro aparatonan, Tony Sevold tambe di Metabolic Foundation a splica cu den pasado nan a haci algun proyecto cu fondonan di UNESCO pa desaroya y test hermentnan pa monitor.

El a splica cu online tambe nan a wak diseño y construccion di diferente aparato incluyendo sensornan.

Segun Sevold den nan proyecto a haci uso tambe di imagennan di satellite.

Resembid a yuda Metabolic Foundation cu fondonan cu nan a haya for di Union Europeo.

E organizacion aki ta yuda diferente otro proyecto riba nos isla.

Ridderstaat a indica cu e meta principal di nan proyecto tabata mas tanto pa Metabolic Foundation logra pone tur sensor y aparato na nan lugar, pa por midi locual nan kier a midi.

Via imagennan di satellite sinembargo a logra bay bek 20 aña y a nota con a bin cambionan pa loke ta e islanan di rif.

Sevold a splica cu e proyecto Surfside Science no tabata pa haya sa con e medio ambiente ta cambiando, sino con pa midi locual mester wordo midi.

Awor cu a logra bin cu metodonan, esaki por wordo comparti cu otronan.

Jeremy Granadillo tambe di Metabolic Foundation a splica cu tur e data cu a wordo colecta y valida a wordo agrega riba e website di e fundacion, esta data.brenchies.com.

El a splica cu a midi entre otro temperatura di awa, oxigeno y ‘conductivity’.

Pa aire a uza sensor pa midi con hopi y con grandi e particulanan di stof ta den aire.

Granadillo a trece dilanti tambe cu a uza Artificial Intelligence (AI) pa via un mapa di tur e data haci un analisis.

Metabolic Foundation a keda hopi contento tambe cu nan  haya un mencion honorario pa loke ta e asina yama ‘European Union Citizen Science Prize’, cu ta pone cu e fundacion a wordo permiti di haci un exposicion na Arts Electronica Festival na Austria, pa mustra elementonan di nan proyecto dilanti di mas cu 70.000 bishitante.