Meta ta pa sigui stimula sector primario  

Gregory Fung-a-Fat

ORANJESTAD (AAN): Gregory Fung-a-Fat, presidente di United Farmers Aruba, a splica cu nan a organiza un anochi informativo pa nan miembronan pa asina duna mas splicacion relaciona cu e MoU cu a wordo firma recientemente entre Gobierno di Aruba y United Farmers Aruba, pa asina formaliza e cooperacion y intercambio di informacionnan combina cu estudionan en conhunto, pa desaroyo di mas proyectonan piloto y concentra ariba posibel solucion nan pa mehoracion di e Sector Agricola y di Criansa.

Señor Fung-a-Fat tambe a splica cu e anochi tabata un bon oportunidad pa scucha di e miembronan y esnan cu ainda no conoce nan organizacion.

E tambe a indica cu nan ta trahando riba varios proyecto, manera un website y tambe nan ta preparando pa eleccion di nan hunta directiva, cu lo tuma lugar den luna di Augustus.

Algun beneficio cu miembronan di UFA ta dispone di dje ta educacion, como tambe nan lo yuda cu cualkier problema den parti di sector primario, apesar cu nan no ta defini sector primario como solamente agricultura, pero pesca y criamento di bestia. 

Un di nan meta principal ta pa sigui stimula sector primario na Aruba y asina no bira asina dependiente di importacionnan di cierto producto. El a duna como ehempel e escasez di lechuga na Aruba, hopi compania no tabata sa ken pa yama y esaki ta algo cu nan kier traha riba dje, den un database, cu por indica kico tur ta wordo planta, na unda tin, y ken ta e persona di contacto. Kiermen na lugar di keda yama varios caminda, lo tin un central di datonan disponible.