ORANJESTAD: Diaranson atardi Minister Endy Croes a ricibi bishita di sr. Jayson Geerman y sr. Kedy Koolman, cu ta representa diferente coredo di e deporte di drag race.
Ambos tin un pasion grandi p'e deporte y ta organisa diferente evento durante aña na Palomarga.
Den pasado sr. Geerman y sr. Koolman a yega di maneha e pista di Palomarga. Durante e reunion sr. Geerman y sr. Koolman a trece na conocemento di Minister diferente preocupacion y deseonan di hopi coredo. Y asina trata di contribui di nan manera hunto cu e coredonan pa por tin un bon sincronisacion den e maneho total tanto den e ABM cu ta maneha Palomarga y e coredonan. Nan a expresa nan deseo como tambe di mayoria di e coredonan pa cu Palomarga den su totalidad y nan kier contribui na un manera positivo den e maneho total pa cu esaki.
Minister Endy Croes a scucha cu atencion e puntonan cu a wordo treci pa dilanti y lo traha riba esakinan na bienestar di deporte en general. Drag race sigur ta un deporte cu tin un fanaticada grandi y hunto nos ta bay traha pa progreso di esaki y haci’e grandi un biaha mas. Cu e deseo, disciplina, dedicacion y determinacion ta logra e meta principal.
