Señor Ricky Hoek:
ORANJESTAD (AAN): - Siberi Foundation a wordo funda fin di augustus 2025. Señor Ricky Hoek, conoci pa su experenianan amplio den diferente trabounan den e campo social, a mira un necesidad den e campo pa ayudonan social principalmente pa nos mucha y hobennan pero tambe pa mayornan, y hunto cu señora Wilga Zibel a lanta e fundacion aki.
Señor Hoek den un entrevista cu DIARIO a remarca cu meta di Siberi Foundation ta pa brinda oportunidadnan di desaroyo y crecemento a traves di training y cursonan.
Señor Hoek a enfatisa cu esaki ta un necesidad grandi pa Aruba mirando cu e seccion social semper tin mester di atencion, cuido y sosten, tanto pa e muchanan, e hobennan pero sigur tambe pa e mayornan. E programa ta yuda profesionalnan tambe cu tin mester di sosten y guia of un upgrading den e trabou social cu nan ta haci.
Na 2025, Siberi Foundation a haci un proyecto di 12 siman pa mamanan hoben, for di September pa December. Señora Zibel durante e prome 6 simannan a trata e parti di inteligencia emocional, un tipo di curacion di trauma, y den e di dos parti, señor Hoek a bay riba e parti practico, entre otro, como mama hoben, nan mester pensa riba con nan lo por sostene nan mes entre otro door di cushina, traha bolo, pinta huña, corta cabey. Pero tambe e session aki a basa su mes riba liderazgo, cuido propio, con pa skirbi carta, con pa comunica, entre otro.
Señor Hoek a remarca cu e parti di inteligencia emocional hunto cu e parti practico, ta haci e hobennan mas fuerte pa asina nan por bay bek studia of drenta e mercado laboral. El a remarca cu e proyecto aki lo continua na unda cu tur mama hoben por participa sin preocupacion di idioma. Materialnan cu nan ta uza a wordo crea pa señora Zibel y señor Hoek ta traduci nan na otro idioma pa asina tur hoben y nan mayornan por sigui e curso y compronde.
Tambe, segun señor Hoek, pronto lo expande programanan y lo cuminsa cu un proyecto pa mayornan di e mamanan hoben tambe, pa asina nan tambe siña conoce e programa.
