Meta di proyecto “Tales of Cas Veneranda” ta pa tur hende cu tabata tin di haber cu ne conta nan historia

ORANJESTAD (AAN) – Mirela Nava, Relacionista Publico di Monumentenfonds Aruba, den conferencia di prensa tocante e proyecto Cas Veneranda,

a gradici “Prins Bernhard CultuureFonds Caribisch Gebiet, pa financia e proyecto “Tales of Cas Veneranda”.

Nava a splica cu pa e proyecto aki nan ta colaborando hunto cu MIC “Mobile International Company” di Hulanda, cu nan proyecto Tales of Culture” cu ta un proyecto cu nan ta usando pa basta tempo na Hulanda, na diferente museo, actividadnan cultural, y tambe monumentonan unda tur hende por contribui cu nan historianan, tanto e trahadornan como e comunidad y e boluntarionan.

Por ehemplo, nan tabata tin un “Open monumenten dag” na unda miles di monumento a habri nan portanan y via e “Tales of Culture” diferente hende por a conta nan historia tambe y haya hasta tours riba e dia aki.

“Nos a scoge e proyecto di Cas Veneranda como piloto pa ‘tales of culture’pa nos a duna e titulo di ‘Tales of Cas Veneranda’ pasobra den e caso aki nos ta conta historia di Cas Veneranda y, asina, despues di tempo nos lo evalua pa nos por usa e sistema aki na diferente monumento, y asina tur por contribui cu diferente historia pero tambe pa comunidad y e bishitantenan por siña mas di e historia di e diferente monumentonan”, señora Nava a señala. 

META DI E PROYECTO:

E Relacionista Publico a splica cu e meta di e proyecto aki ta pa comunidad por participa activamente, compartiendo nan historia, anecdota, recuerdo, fotografianan, “Den e cas aki ta e famia cu a biba den e cas, specialmente Federico Maximiliano Arends, y Maria Veneranda Arends-Lacle, pero tambe fotografianan di e cas mes, na Wilhelminastraat-7.

“Y asina, hunto cu Comunidad nos por preserva e bunita monumento aki pa futuro generacionnan. E proyecto aki lo tin un duracion di un aña largo”, Nava a subraya.