E lo pasa na October den Cas di Cultura
ORANJESTAD (AAN): Durante luna di October venidero, Aruba lo bay cera conoci cu un obra teatral di caliber halto, cu lo bay keda sigur marca den historia, y cu lo por kizas competi den futuro tambe na festivalnan internacional di teatro.
Un obra teatral cu decór inigualable riba stage di Cas di Cultura, y lo bay combina cu diferente avance tecnologico tambe pa haci e obra “Spirito” bira esun cu tur hende lo bay papia y memoriza como esun di mas grandi di 2023.
Durante un conferencia di prensa convoca recien den sala grandi di Cas di Cultura, e directora di e obra teatral, algun di e miembronan di e elenco a expresa nan orguyo di por tin e dama Hilda Hellwig como un directora di teatro renombra di Europa, ta dedica e obra aki na Aruba y na Papiamento.
Spirito ta toca e tema di relacionnan familiar usando drama, humor, picardia, intriga y tension. Pesey publico di edad 16 bay ariba so ta wordo permiti.
E storia ta cu Famia Alving, un famia cu “moda”, ta bezig ta deal cu un pasado cu ainda ta sigui nan den presente. Tur e personahenan tin nan propio muchila di problema, reto y secreto y riba un dia tur cos ta wordo revela. E storia a wordo skirbi na aña 1881, originalmente di Henrik Ibsen, e tata di teatro moderno, ta specialmente scohi pa Aruba door di directora sra. Hellwig, cu a mira e contexto di Aruba y e temanan social cu ta reina. Sra. Hellwig a situa e storia den añanan 1980, e dianan di gloria di e novelanan di Venezuela y Latino America. Asina, manera un novela, cu hopi suspenso e storia ta wordo treci. Sra. Hellwig ta un pionero di teatro “avant garde”, p’esey por spera un manera unico di conta e storia aki. Tambe lo tin un décor spectacular, special traha pa esaki.
Miembro di elenco, Jhon Freddy Montoya a declara durante e conferencia di prensa, cu ta un placer di forma parti di e obra maraviyoso aki. E ta insisti pa pueblo di Aruba percura pa nan bay mira ‘Spirito’ y disfruta di e maraviya cu loke tin pa comparti, tanto di e talentonan local bao direccion di un experto internacional.
El a gradici Cas di Cultura pa e iniciativa di trece e obra teatral di caliber aki den e pleno celebracion di 60 aña pa a bin cu un obra di kita sombre. Den talento, awor Aruba ta demostra di tin e capacidad pa wordo dirigi door di un persona internacional.
Freddy Montoya a bisa cu e ta un storia clasico, cu toquenan moderno contemporaneo cu escenanan cu lo laga pueblo hopi sorprenid mes.
