ORANJESTAD (AAN) – Tisa La Sorte, CEO di AHATA, a trece dilanti, den conferencia di prensa, cu nan ta aprecia e reunionnan cu nan tin cu Departamento di Impuesto (den cuadro di BTW),
unda nan ta participa nan calculacionnan na e Asociacion aki, pero nan tin un preocupacion y esaki ta cu tur e informacionnan cu nan a ricibi te awo, no ta inclui ainda e parti unda cu Gobierno ta avisa AHATA con y cu cuanto nan ta bay corta nan gasto.
La Sorte a splica cu ora di haci un reforma fiscal, e departamento di impuesto ta haci su calculacionnan pa yega na un cierto nivel di entrada pa gobierno; esey ta determina e ora ey pa gobierno dicidi cuanto nan kier genera cu e reforma fiscal.
“Na opinion di AHATA, prome cu determina e cantidad ey, gobierno mester baha su gasto, pa asina bo ta baha e peso di impuesto riba henter nos pueblo” La Sorte a señala.
El a agrega cu nan ta papiando di diferente impuesto y AHATA tin mas preocupacion. “Nan no ta papiando di kizas un BTW, cu ta bay ta hopi mas halto cu loke nos ta pagando awo cu BBO, y esey kiermen cu restaurantnan ta bay bira mas caro, bo compras ta bay bira mas caro, nan ta papiando di hisa e ‘tourism levy’ cu ta e impuesto cu e turista ta paga pa su camber of su apartamento, ora e bin keda na Aruba. Nan ta papiando di un impuesto nobo cu kizas e turista ta bay paga ora drenta Aruba, y plus e prijs pa consumo na Aruba ta bay bira mas halto”, La Sorte a subraya.
E dama a remarca cu Aruba ya ta caro caba pa un turista, y e ta caro caba pa e pueblo residente. “Con caro nos por laga Aruba bira, prome cu nos cuminza perde den nos turismo? Nan ta bay scoge di bay otro caminda na lugar di bin Aruba? Y ningun estudio a wordo haci ainda pa demostra na ki momento nos ta yega eynan, cu por ta nos tin un efecto negativo riba nos economia. Nos turismo ta bay baha, nos consumo ta bay baha pasobra tur cos ta caro, y esey kiermen e ora ey cu nos tin menos productividad economico y menos entrada pa gobierno; Dus, e ora bo resultado ta diferente cu loke bo a spera ora bo a cuminza bo reforma fiscal”, Tisa La Sorte a remarca.
Esaki ta e preocupacion di mas grandi cu AHATA tin, y nan ta determina di tur e informacionnan cu nan ta mira, ta cu e miho forma di reforma fiscal ta pa yega na un tarifa di BTW envez di dos. La Sorte a expresa cu claramente e ta haci un diferencia kico e tarifa ta, tambe.
“Pa yega na un tarifa corecto cu no ta kibra nos economia y cu no ta kibra e poder di compra, mester tin un bon calculacion y bon ‘assumptions’ di loke bo ta tumando di nos economia, di inflacion, etc. En general, nos conclusion ta cu enberdad mester keda un tarifa, e mester ta un tarifa bon calcula, cu bon informacion, baha gasto di gobierno tambe pa yega na e cantidad ey, y un base amplio”, Tisa La Sorte, CEO di AHATA a remarca.
