Guera, horcan, pandemia, petroleo ta entrega reto nobo pa periodismo --- *Hulanda, Europa, Merca den problema serio pa produci cuminda --- *Union historico na 2022 di tur elemento enemigo di bienestar di hende
ORANJESTAD(AAN)—Na 2017, Aruba a bira victima di un situacion den cual fantasia a wordo presenta na Pueblo cu un proyecto yama Citgo.
Na 2018, DIARIO a introduci e optima forma di periodismo, cu ta directamente mara na investigacion, uzo di leynan cu ta exigi transparencia den tur documento y accion den tur sector, cu mester por contesta tur pregunta cu ta hiba hende na fundeshi di democracia.
Rapportnan di 2017 no a papia solamente di leynan di e pais, pero tambe a mustra con dos aspecto a yuda crea expectativanan falso pa Aruba.
Na 2014 por nota con turismo for di Venezuela a subi pasobra Venezolanonan tabata huy di nan pais y su direccion di terorismo politico y tabata pasa Aruba pa lanta placa.
Na 2017 turismo di Aruba a haya un boost, pa motibo cu turistanan cu a bay otro islanan den Caribe a worde confronta cu e desaster cu temporada di horcan a produci.
For di su inicio na 1983, DIARIO tabata tin un relacion unico cu uno di e departamentonan cu no ta encarga cu causa panico ni exigi hende bay sconde pa un dushi yobida, pero ta adverti pa e enemigo mortal di hende, cu ta horcan.
Nos relacion cu Servicio Meteorologico ta data for di e momento cu tur isla Hulandes den Caribe, a registra regreso di yiunan di tera cu preparacion educacional avansa.
Na epoca 70, Antia Hulandes a conoce entrada di e prome profesional Antiano, Arthur Dania, cu estudio Europeo, cu National Hurricane Center a honra.
Arubianonan cu gran experencia cu capacitacion necesario a sostene Status Aparte riba e tereno di clima, cu awe ta crucial.
Nos mester para keto na e momento aki, pa splica tambe e exigencia cu periodismo tin pa por lucha na bienestar di e pais, sin depende completamente di otro loke por afecta validez di informacion.
Na decada 70 prevencion di morto, di destruccion di economia y di bienestar di hende dor di condicion di tempo, a exigi dirigente di corant, pa permiti Servicio Meteorologico, uni nan na e lista di personanan y instancianan cu a ricibi un base educativo special pa hunto cu Servicio Meteorologico, infoma Publico.
Kico calamidad por nifica, ta parti di e pakete basico di responsabilidad periodistico, cu suficiente conocimento di calamidad, enfermedadnan peligroso, peliger pa seguridad nacional.
Na 2018, e situacion di Aruba a exigi di DIARIO pa introduci investigacion local y internacional pa asina por a deshaci di e fantasia di Citgo, cu a azota bienestar di Aruba.
Awe nos ta entrega Aruba e mihor di nos mes, na momento cu condicionnan di clima ta menasa hende den un situacion di guera internacional y e lucha contra Covid-19 y den un base economico mundial kibra
Awe calor extremo ta afecta produccion di cuminda na Europa y nos ta den contacto cu e sector campesino y productor di cuminda na Europa , pa informa Pueblo di Aruba.
Condicionnan di tempo, manera calor y caida di biento, ta afecta salud di hende.
Economia mundial ta basha abou y nos contactonan cu e central mundial financiero di Wallstreet na New York City, ta pinta peligronan sumamente grandi pa economia mundial, di cual Aruba tambe ta depende.
E aumento di costo di bida ta preocupacion grandi di Merca, mescos cu e fayo pa deshaci di Omicron cu ta palo di horca pa economia na diferente pais na Asia.
Periodismo ta exigi entrega di berdad na Aruba, cu paso a paso nos lo sigui informa manera nos a haci na 2018 ora nos a rementa e fantasia di Citgo.
Omicron ya a mata Un Miyon di hende na Merca, Dos Miyon di hende na Europa y na e momentonan aki nos contactonan ta bati alarma pa aumento, cu dor di vacuna a baha cifra di hospitalisacion y mortalidad.
Cuanto hende a wordo permanentemente afecta, no ta conoci.
Guera rond mundo ta un peliger pa Aruba, situacion den e region Venezolano, caminda aliadonan di Rusia y paisnan subversivo cu tin sosten di Rusia, a crea nan centro.
Seguridad Nacional no ta permiti habri portanan di Aruba cu tambe por wordo confronta cu personanan cu ta huy di Colombia, caminda comunismo kier haya mando den eleccion riba termino corto.
Manera tabata e caso na 2018, hunto cu Aruba nos ta enfrenta un situacion cu te awor historia di Aruba no a produci.
Nos esfuersonan ta dirigi riba futuro di Aruba.
