Cruyff Courts ta feliz cu nomber di Denzel Dumfries tambe a bin acerca riba e cancha

Simon van Rooijen splicando cu UEFA Foundation for Children tambe a yuda

ORANJESTAD (AAN): Diaranson atardi na Parke Curazon na Jaburibari, a tuma lugar e re-apertura di e cancha chikito di futbol cu yama ‘Johan Cruyff Court’.

    Un ceremonia special cu hopi dignatario, futbolista hoben, y invitadonan special di e.o. IBiSA, FCCA, AVB, y Simon van Rooijen di Cruyff Foundation, Nicole Hoevertsz di COA, ASU, a ser teni pa asina e cancha completamente remodela por a habri bek.

   Johan Cruyff Foundation a wordo lanta na 1997 door di e futbolista Johan Cruyff mes, cu e meta pa ofrece proyectonan na comunidad.  Aruba a ricibi uno di nan, y pesey mes Simon van Rooiyen di Cruyff Courts tabata e prome pa hiba palabra.

   Van Rooijen a bisa cu e fundacion aki pa 25 aña caba ta trahando duro pa duna hobennan e espacio pa nan por keda fisicamente activo.  Na 2006 a logra di habri e Cruyff Court riba Aruba.  El a funciona basta bon pa duna hobennan den e bario e chens di por hunga y haci deporte.  Pero awor e mester a haya un renobacion, y sigur Cruyff Court ta agradecido na nan partnernan cu a duna un man pa haci esaki posible, e.o. Nederlandse Postcode Loterij, UEFA Foundation for Children, y companianan local cu a duna un man pa crea bida bek den e cancha aki na Aruba.

   Den ultimo periodo aki a haci hopi combersacion cu partnernan local, pa asina laga e veld aki funciona mas optimal aun pa hobennan di Aruba.

   E cancha ta parce un veld di Futbol, pero Van Rooijen a insisti cu e ta mucho mas cu djis un veld.  E ta un espacio pa topa otro, pa asina combersa y pasa momentonan agradable.  Tur esaki pa yuda hobennan crea un mihor futuro pa nan mes.

   E responsabilidad lo keda pa sigui organiza actividad pa hobennan, y el a mustra cu Cruyff Foundation ta extra orguyoso cu un futbolista di Aruba, un heroe local cu ta cosechando exito den Futbol Europeo, lo bay ricibi su nomber tambe poni riba e cancha aki.

    Cu nomber di Denzel Dumfries poni riba e cancha aki, sigur ta un estimulo extra pa hubentud di Aruba.

   Despues di esaki, den presencia di Ministro di Deporte Endy Croes, a duna honor na Simon van Rooijen di Cruyff Courts, pa scop e prome bala pa asina declara e cancha aki oficialmente habri.

   Despues Van Rooijen a firma un bala di futbol tambe pa Ministro Croes.