Grado di vacunacion den grupo di entre 12 pa 17 aña ta apenas di 33 %

ORANJESTAD (AAN): Chris Goedhart di Departamento di Salud Publico tambe tabata presente durante conferencia di prensa di Crisis Team pa asina duna mas informacion relaciona cu e Vacunathon 3.0.

Gordhart a bisa cu e Vacunathon lo tuma lugar diadomingo 22 di Augustus den Ballroom di Ritz Carlton pa 9'or di mainta, nonstop te cu 4'or di atardi. Nan a dicidi di organiza un di tres vacunathon pa motibo cu demanda pa vacuna a aumenta. Na DVG nan tin un capacidad di atende mas o menos 400 persona pa dia y nan a ripara cu e demanda pa vacuna a subi y nan no kier pa hende warda hopi dia pa haya nan vacuna, mirando e importancia di e vacuna.

Pa motibo aki, DVG y Ministerio di Salud conhuntamente cu SVB y AZV ta organisa otro Vacunathon pa tur ciudadano na Aruba cu ainda no a vacuna. Sea nan cu ta wardando nan cita, of personanan cu no tin cita ainda. DVG ta wak cu tin un grupo di persona cu a haya nan prome vacuna, pero pa cualkier otro motibo no a haya nan di dos vacuna. E vacunathon aki ta e oportunidad pa nan por haci esaki tambe.

Goedhart a enfatiza cu esaki ta un 'walk-in', kiermen djis presenta y haya e vacuna, nan no ta trata cu cita riba e dia aki. 'first come, first serve'. Riba e vacunathon aki nan tin capacidad pa atende entre 2 mil y 2.500 persona.   

E meta di e vacunathon ta pa percura pa haya un grado di vacunacion mas halto. Actualmente DVG tin datonan di un grado di vacunacion di 63 porciento di e populacion di 18 aña bay ariba cu a haya nan prome vacuna, y un average di mas o menos 60 porciento di e populacion cu a haya dos dosis. Esaki no ta suficiente pa logra e meta di 85 porciento y specialmente den e grupo di entre 12 pa 17 aña, nan a wak un grado di vacunacion hopi abao di apenas 33 porciento. Aunke e Vacunathon ta pa tur persona di 12 aña bay ariba, nan kier urgi, tanto hoben y adultonan, pa acudi na e evento aki. 

Un biaha mas, nan ta invita tur ciudadano cuminsando for di 12 aña bay ariba pa bin vacuna riba e dia aki. Bin cu bo AZV y si bo no tin AZV pero ta biba na Aruba por presenta cu un paspoort. E vacuna disponibel lo ta Pfizer mirando e grado di efectividad halto.

Goedhart a bolbe recorda cu esnan cu a ricibi 1 vacuna pero no a busca su di 2 ainda pa pasa tambe y busca su vacuna. Entre e prome y di dos vacuna mester tin 3 siman si.

E invitacion ta na comunidad pa yega y haci uzo di e oportunidad aki muy en particular hobennan cu tin pa cuminsa scol pronto. Vacuna pa proteha bo mes, bo famia y bo pais.