Cambionan grandi ta stroba participacion di grupo grandi di ciudadano - *Mercadeo di productonan y servicionan nobo ta faya cu comunidad - *Clientenan mester sigui curso universitario pa nan haya servicio
ORANJESTAD (AAN) — Cu mundo ta biba den un epoca di cambio, ta algo cu DIARIO a anuncia hopi tempo pasa.
Realmente bida y historia humano ta un cadena di ciclonan di cambio cu por nifica progreso pero tambe por afecta un grupo grandi den comunidad, cu no a haya oportunidad pa prepara su mes of pa costumbra cu e cambionan cu ta wordo introduci.
Companianan cu ta traha na forma efectivo, den nan plan di mercadeo di e cambionan cu nan kier introduci, ta consciente cu nan mester percura pa personanan cu ta haci uzo di nan servicio ta na haltura, con atende cu e cambionan.
Pa esaki por ta un realidad, mester tene na consideracion e posibilidad pa tur grupo den comunidad ta na haltura di loke mester haci of no haci pa asina tur hende por gosa di mihor servicio, sigur si nan ta paga pa e servicio aki.
Cu computer a cambia mundo, ta conoci. E ta un hecho pa tur hende cu habri nan wowo mainta y realisa con dificil e era digital a haci mundo pero tambe cuanto problema y peliger e ta encera pa un grupo hopi grandi den comunidad, cu no tin e preparacion necesario pa por biba cu e cambio.
Servicio importante den comunidad cada dia ta bira mas dificil y aki nos no ta papia di Gobierno como instancia.
Aki nos ta papia di servicionan cu ta wordo duna na clientenan cu no ta haya oportunidad pa bay sigui un curso universitario pa asina nan comprende loke un compania a introduci y ta exigi pa su clientenan comprende.
Ora mira e exigencianan basico di introduccion di un sistema nobo na comunidad, un compania cu ta introduci un sistema nobo, mester percura pa su clientenan por sigui haci uzo di su servicio.
Prome cu introduci cambio pues, pa un bon resultado pa negoshi y cliente, mester haci un estudio cu ta indica si e gran mayoria di cliente por sigui haci uzo di e servicio.
Mas y mas por nota cu uzo ta wordo haci di servicionan “online”. Hopi hende tin berguensa di bisa cu nan no ta comprende kico nan mester haci.
Hopi bez e personanan cu a dirigi e cambio di servicio mes, mester a bay un curso pa nan haya conocemento di e materia cu ta impone riba clientenan.
DIARIO a tuma nota di reclamo di varios grupo den comunidad, cu tin problema cu exigencianan nobo pa servicio.
No ta tur hende tin computer. Hopi hende ta uza nan telefon pa haya entrada na servicionan nobo, cu awor nan mester atende na forma digital.
E grupo di persona cu edad mas halto, tin problema pa uza un telefon pa nan haya un servicio pa cual nan ta paga.
Hobennan cu no tin aceso na cierto luho, tampoco por haci uzo di cierto servicionan cu ta basico sigur den un comunidad moderno.
DIARIO tambe conoce e era digital. Por lesa parti di DIARIO riba computer. Pero pa e persona cu a costumbra pa lesa su matutino sinta den su stul, DIARIO ta sigui subi mercado na forma imprimi.
Mundo ta den un era di cambio. Pero exigencianan no por wordo exigi di clientenan cu ta bira victima di nan falta di conocemento di sistemanan cu tabata desconoci pa nan ora nan a acepta un servicio.
Tanto pa e persona cu ta duna servicio como pa e persona cu ta haya servicio, ta importante pa e servicio aki tin bon resultado. Pa esaki ta e caso, e mester sirbi tanto cliente como dunador di servicio!
