Mester stimula muchanan pa lesa mas y kita nan un poco for di e “screen”

ORANJESTAD (AAN): Parlamentario Hendrik Tevreden a haya invitacion pa bishita Fatima College en conexion cu apertura di Siman di Buki. E tema pa e aña aki ta, 'Ta loke bo kier ta!'

Un tremendo tema cu ta permiti e muchanan cuminsa enfoca di awor caba riba nan profesion pa futuro. Tur mucha por bira loke nan kier bira, si nos percura pa yuda nan segun Tevreden.

   “Semper e ta special, pa bishita e scolnan den mi bario stima Dakota. Sea ta pa yuda nan verf scol, o pa celebracion, semper e ta un honor pa sostene nos muchanan, parlamentario Tevreden a remarca”. E mainta aki, na e apertura di siman di buki, mi por a mira con e muchanan a briya di mira cada profesion presente. Piloto, bombero, paramedico y asistente di ambulance. Sin lubida e maestronan y tambe parlamentario. Den algun di e klasnan tabata tin algun mucha cu kier bira deportista profesional tambe.

   Fatima College tur aña ta sigi crece, danki na e dedicacion di tur e maestronan y sin duda su cabesante meneer Richardson cu a bin ta traha duro pa logra hopi cos pa su scol. Aña escolar pasa, cu ayudo di ministro presidente, nos a logra pa DOW asfalta full e tereno di scol pa asina e muchanan por a habri aña escolar aki cu speelplaats completamente asfalta. Awor e muchanan por hunga masha dushi riba e speelplaats sin tin cu preocupa pa trompica den buraco.

   Segun e parlamentario, tabata un placer di por mira esaki wordo realisa y sigur e lo sigi brinda apoyo na tur scol na Aruba, y sin duda esnan di su bario, 'Dakota tur dia!'.

   "Mi ta desea tur muchanan un felis siman di buki y pa nan probecha lesa tur e bukinan di nos diferente autornan local cu ta riba mercado. Mayornan corda pa toca e tema cu bo yiu di ‘ta loke bo kier ta’ pa asina di awor caba nan por stipula nan meta pa logra e profesion cu kier."

   Parlamentario Tevreden ta recorda mayornan cu te cu dia 12 di november tin Exposicion di festival di buki pa muchanan na biblioteca San Nicolas y Oranjestad sin lubida e benta di bukinan segunda mano na bon prijs pa e muchanan. Lesamento ta hopi bon, laga nos kita e muchanan un poco di e “screen” y siña nan pa goza di un tremendo buki. Hasiendo esaki nos ta contribuyendo na nan futuro, Tevreden a termina bisando.