Mester sigui conscientisa comunidad riba e importancia di inclusion

Parlamentario Shailiny Tromp-Lee (MEP):

ORANJESTAD (AAN): Diadomingo ultimo Parlamentario Shailiny Tromp-Lee a asisti na e show di “Sea bunita, Sea bo mes” den cuadro di celebracion di Dia Internacional di Derechonan di Mucha.

E anochi a cuminsa cu un sketch caminda ta duna atencion na termento y abuso di mucha. Un manera pa empodera nos mucha y hobennan pa nan sa kico pa haci y cu nan tin derecho.

E show a sigui caminda nos mucha y hobennan special cu hopi entusiasmo a realisa diferente presentacion y asina celebra e Dia Internacional di Derecho di Mucha.

Como parti di e actividad tabatin un show di modelahe caminda un total di 28 mucha y hobennan special a participa hunto cu un celebridad.

Sigur mediante actividadnan asina nos por conscientisa di e importancia di inclusion. Tur mucha sin excepcion tin derecho riba e.o. educacion, proteccion, trato husto y mucho mas.

Un tremendo actividad cu a brinda nos mucha y hobennan special e bunita plataforma pa desplega nan talento den baile, canto y teatro. Tabata un anochi bunita y impresionante. Un pabien na e organisadornan, nos celebridadnan y mas cu claro na nos mucha y hobennan cu a duna un excelente presentacion. Sigur nan a duna contenido na e tema di e aña aki cu ta Inclusion pa tur mucha. Pabien!