ORANJESTAD (AAN): Den fin di siman, Ministerio di Husticia y Asuntonan Social a organisa e “marcha pa nos derechonan” un biaha mas,
cual ta netamente un marcha en conexion cu dia internacional di Derecho di Mucha.
Dia 20 di November, ta dia internacional di Derecho di Mucha, y pa pone enfasis riba e importancia di esaki, a marcha un bes mas, asina demostrando Aruba y mundo henter cu mucha tambe tin nan derechonan, y e ta hopi importante pa nos tur por crea e espacio pa e mucha por vocifera esaki tambe.
Manera ta conoci, e aña aki Ministerio di Husticia y Asuntonan Social a lansa e proyecto unico di "Mi Mesun Heroe". Un proyecto sumamente importante, caminda a traves di un programa di entretenimento, ta podera y curasha cada mucha pa traha riba e confiansa den nan mes, door di siña nan for di trempan kico tur ta nan derechonan y con pa identifica y preveni cualkier tipo di abuso.
Segun minister di Husticia y Asuntonan Social Rocco Tjon a expresa, esaki eigenlijk ta tarea di un adulto, sinembargo ta consciente tambe cu tin biaha e ta dificil pa muchanan comunica cu un adulto. Pa e motibo aki, a traves di e programa aki, e obhetivo ta pa logra convence cada mucha, cu semper tin un hende cu lo t’ey pa nan, sea ta un mayor, famia, amigo, docente of instancia.
Na mes momento, ta para keto un rato na e hecho cu siman pasa tawata tin varios actividad pa mayornan y nan yiunan. E aña aki a celebra e prome lustro, cu ta organisa e ‘siman di lantamento di mucha’, cual no ta un esfuerso di gobierno so pero di diferente organisacionnan no-gubernamental cu ta yena e calendario. Hopi biaha ta papia di problema, sinembargo ta duna e siman aki un caracter preventivo.
Lantamento di un yiu no ta un tarea facil, un yiu no ta bin cu un manual y cada mucha ta unico, loke ta haci esaki un poco dificil tin biaha, pa dicidi con ta e miho manera pa lanta un mucha. Pues asina ta cu durante e siman “lantamento di mucha” diferente organisacionnan y fundacionnan ta brinda e guia y sosten na e mayornan y guiadonan cu tin mester di esaki.
Por ultimo, por bisa, cu ta purba riba diferente tereno pa cuida nos muchanan y nan derechonan, dunando asistencia na e mayornan y guiadonan cu tin cu percura pa esaki. Minister Tjon a gradici tambe colega Minister di Enseñansa y Deporte, sr. Endy Croes pa su presencia, pero tambe na tur e mayornan, docentenan, representantenan di IBiSA, representantenan di Grupo Scouting, tur fundacionnan, organisacionnan, prensa y particularmente na nos heroenan di cambio y cada muchanan cu a haci e atardi, uno special.
