Camara di Comercio:
ORANJESTAD (AAN): Recientemente durante un conferencia di prensa, director ehecutivo di Camara di Comercio (KvK), Martijn Balkestein, a recorda tur comerciante cu introduccion di buki 2 di codigo civil tin consecuencianan amplio pa nan tur.
“Entre otro tin cambionan pa fundacionnan, unda cu nan tur tin e obligacion legal pa registra nan mes den e registro di negoshi (handelsregister)”.
Desde e aña aki e registro di fundacion, locual ta wordo yama ‘stichtingen register’, ta forma parti di nos registro di negoshi, pues nan a wordo integra hunto, segun Balkestein.
El a sigui bisa cu fundacionnan cu tabata registra den e registro di negoshi prome cu Januari di 2021, no mester registra nan mes di nobo cerca KvK pasobra nan datonan automaticamente a bay den e registro civil.
El a splica cu nan no mester paga tampoco pa inscripcion nobo, pero e ley nobo ta stipula si cu nan mester paga nan contribucion annual.
E director a sigui bisa cu e ley di buki 2 codigo civil tambe tin cambio pa e asociacion.
Buki 2 ta haci un distincion entre asociacionnan cu tin autoridad legal completo y asociacionnan cu tin autoridad legal limita.
E asociacion cu tin autoridad legal completo ta wordo constitui via un acta notarial.
“E asociacion ey tin mesun derecho cu cualkier ciudadano”.
Por ehempel nan por adkiri propiedad registra of porta un herencia.
E asociacion mes ta responsabel pa tur cos cu e organizacion ta haci, pues tambe pa cualkier debe y e dirigentenan en principio no, segun Balkestein.
El a sigui bisa cu nan tin e obligacion pa inscribi nan mes e aña aki den e registro di KvK y si e ta nobo nan mester paga nan contribucion annual tambe.
Segun Balkestein, e asociacionnan cu tin e autoridad legal limita no ta wordo constitui via un acta notarial y nan no por adkiri tampoco propiedad registra, ni hereda propiedad.
“Locual ta hopi importante pa realiza ta cu e dirigentenan personalmente ta responsabel pa cualkier debe cu e organizacion haci”.
E ta un riesgo, pero e riesgo por wordo limita na momento cu e asociacion y inscribi su mes na Camara di Comercio.
Pesey nos ta urgi tur asociacion cu tin autoridad legal completo y esunnan cu autoridad limita, pa inscribi na mes na KvK, segun Balkestein.
Buki 2 tin consecuencia tambe pa AVV’s.
“Tur cu ta activo mester wordo converti den un otro forma huridico sea un VBA of un N.V y AVV’s cu no ta activo mas mester wordo disolvi pa Camara di Comercio”.
Esey tin di haber cu rekisitonan internacional, segun Balkestein.
