Leynan cu a wordo trata ayera den Parlamento ta sostene posicion DIARIO - Mester cera porta di Aruba pa peliger cu ta sconde pafor di costa y bista - Prueba cu a wordo uza pa reconteo di voto ta exigi cambio contra corupcion
ORANJESTAD(AAN)- For di e momento cu pais Aruba a cuminsa existi, corupcion tabata e palabra cu a bini dilanti. Den e turbulencia cu Aruba a conoce na entrada di su Status Aparte a base di e salida di Lago y sigur despues di e morto di Betico Croes, cu a paralisa Aruba, tabata tin desaroyo serio.
Algo sumamente serio cu despues a perde tur atencion mientras Aruba tabata trata di ahusta su mes na un Status Aparte diferente di loke el a pensa, tabata e yegada di un grupo Italiano, cu mester a bandona e pais na careda ora Interpol a califica nan como banda criminal.
Aparentemente Italianonan tabata stima Aruba, cu a mira entrada di proyecto di Beta Hotel, cu a bira un investigacion internacional den cual nomber di e prome Gobierno di Aruba a resona.
Aruba a sigui cana. Aruba a topa cu e Caso Fondo Desaroyo Nobo San Nicolas, cu a pone castigo riba cabez di tres Ministro na entrada di Siglo 21, ora na un beach un acuerdo a wordo logra entre abogado di e Ministronan y Ministerio Publico pa pone un punto final tras di mas desaroyo den apelacion, mientras e proximo lider di e partido politico envolvi, a prepara su mes y a bira Prome Ministro di Aruba na 2009.
Di e temporada di gobernacion entre 2009 y 2017, Ministerio Publico a wordo confronta cu basta trabou. Hasta overtime, cu lo sigui den e proximo lunanan den casonan criminal cu e periodo di gobernacion 2009 pa 2017, a produci.
Den e problemanan serio di un pandemia mundial, awe Aruba ta busca un caminda nobo, pero tur dia atrobe destino ta presenta un motibo pa splica Aruba, cu pa e por sigui cana y lucha pa su recuperacion, e mester pasa un basora fuerte di sabana den su mundo politico.
Den sala di Corte, Huez y no cualkier instancia, a entrega e prueba di nacemento di corupcion, ora e partido cu den e casonan grandi di corupcion cu Aruba a conoce tabata na mando, a dicidi di bay pidi reconteo di voto.
Tabata Huez atrobe cu a acusa AVP di ta comete un acto ilegal y e biaha aki na urna electoral, caminda na un forma of otro a logra saca portret di formularionan di voto cu den un falta di respet total, a wordo entrega na Huez como prueba pa e reconteo di voto cu AVP kier.
Huez a papia di e porta cu e pruebanan aki ta habri pa corupcion, cu sigur ta cuminsa ora un votador por entrega un partido politico prueba di e forma cu el a vota y asina por finalisa benta di su voto.
Palabranan di Huez a resona atrobe contra practica di AVP, cu a pinta un linea cora den e historia di corupcion na Aruba caminda e partido a bay Huez pa sigui haya registro di votonan pa asina si un hende no bay vota, nan bay busca e hende na cas pa e hende vota, loke Huez a yama pone presion riba votador pa vota.
Ayera un Aruba yena cu scandal, a tuma nota di e programa di Gobierno nobo cu otro siman lo mester bira realidad cu anuncio di e Ministronan nobo. Na mes momento den sala di Parlamento tabata trata leynan cu mester evita labamento di placa y crimen organisa den e forma cu placa sushi ta lora manera ta sosode ora un politico ricibi placa pa fabor di corupcion.
Ley ayera a sostene e posicion di DIARIO a base di loke ta biba den Pueblo di Aruba, cu ta cansa di corupcion.
E prome paso di e Gobierno nobo mester ta, cu ta uza un basora fuerte di sabana pa tene un limpiesa profundo di Aruba pa asina deshaci di tur sushi cu ta drenta na forma secreto pa destrui Aruba cu corupcion y aumento di criminalidad bisti na bachi.
Aruba mester bolbe na awa limpi di acuerdo cu e macuto di balor di e pais, caminda democracia ta entrega na tur ciudadano e derechonan cu tur hende tin sin cu nan mester mira con nan ta haci prestamo pa haya placa pa entrega na mundo politico cu hasta a habri porta pa hende cu a haya libertad temporal di prizon, representa Pueblo den Parlamento!
