ORANJESTAD (AAN): Diahuebs atardi net dilanti di Nicolaas Store na San Nicolas, a tuma lugar e firmamento di e acuerdo di gobernacion entre Partido MEP y Partido RAIZ.
Nan a haci esaki, riba peticion di Andy Hernandez di San Nicolas Business Association, kendenan a trece esaki dilanti durante e reunionnan di Stakeholders.
SNBA tabata un di e 101 stakeholders cu Formador y futuro partner di coalicion a papia cune, y mesora a bay di acuerdo pa haci esey na San Nicolas. Nan tambe ta mira e oportunidad di crecimento y oportunidad pa henter Aruba.
MEP y RAIZ a firma e acuerdo di gobernacion, pero nan mes no ta cla ainda, pero e ta un paso hopi mas cerca pa tin siguiente gobierno. E acuerdo aki ta e base den linea grandi kico nan como MEP y RAIZ ta bay enfoca na dje den e siguiente cuatro añanan.
Esey nifica cu ainda falta pa reparticion di cartera, y despues pa apunta y propone candidato pa Ministro pa cada un partidonan.
Te cu awor a papia cu 101 stakeholder externo, y esaki forma e base cu nan ta firmando e acuerdo aki. Tanto MEP y RAIZ ta contento di por a topa cu asina hopi stakeholders, di cual varios tabata agradecido, y principalmente ora hopi di nan ta indica cu pa prome biaha nan a wordo scucha. Formador Evelyn Wever-Croes a indica cu ainda nan falta di reuni cu stakeholders interno (departamentonan).
Hecho ta cu prome cu fin di October, cada Ministro lo duna su aporte pa yega na programa di gobernacion mas detaya. E programa aki lo keda completamente finaliza e ora, y Formador Wever-Croes a priminti cu pa fin di October lo presente na Parlamento.
E biaha aki, tanto Evelyn Wever-Croes como lider di MEP, y tambe Ursell Arends como lider di RAIZ a firma e acuerdo aki na forma digital riba un tablet.
