*Pa juni 2023, e cifra di Venezolanonan na Aruba a yega na 17.000
ORANJESTAD (AAN): E raport di investigacion di Amnesty International, titula “Sin Proteccion – Desvelando brechanan den e proteccion di Venezolano na Aruba” ta presenta e hayazgonan di e prome investigacion cu Amnesty International a conduci tocante di e situacion di venezolanonan buscando proteccion na Aruba. A enfoca e investigacion riba e proteccion cu Aruba ta brinda na refugiadonan venezolano.
Despues di e presenta nan conclusionnan, Amnesty International ta haci un yamado na e autoridadnan di Aruba pa adopta leynan specifico pa refugio, cu ley cu ta aplica specificamente pa mucha chikito.
Aruba mester asegura cu e servicio di guardian pa mucha (Voogdijraad) ta wordo invoca pa tur caso cu tin cu a mira cu mucha chikito, y cu ningun mucha chikito no ta wordo detene.
Ademas, e Venezolanonan cu ta solicita asilo, refugio y migrante mester haya acceso na un procedimento di asilo husto y efectivo, inclui informacion den idioma Spaño tocante nan derecho. Aruba no mester forsa ningun Venezolano bay bek Venezuela, of detene automaticamente ningun Venezolano cu drenta Aruba manera iregular.
E gobierno Hulandes mester asegura cu derecho humano ta wordo respeta y proteha den henter Reino Hulandes, y cu sosten financiero y tecnico no ta contribui na abusonan di derecho humano na Aruba.
Crisis na Venezuela
For di 2014-2015, Venezolanonan ta sufri di privacion creciente, erosionando nan derecho economico y social, specificamente na salud y cuminda. For di 2017, hopi Venezolano a huy pa motibo di e politicanan represivo sistematico di e gobierno di Nicolas Maduro, cu ta target e criticonan di gobierno y miembronan di oposicion. Esaki a resulta den abusonan inclui ehecucionnan extrahudicial, uzo di forsa excesivo, detencion arbitrario, tortura y otro forma di maltrato.
E crisis na Venezuela ta caracteriza pa un emergencia humanitario profundo, violacion sistematico di derecho humano, y un caida profundo den su situacion economico y politico.
Esaki a forsa mas di 7.71 miyon Venezolano, 25% di su populacion, pa huy di nan pais y busca proteccion otro caminda, e crisis di desplasamento mas grandi na mundo. Paisnan Latinoamericano y Caribense a ricibi e mayoria di esnan cu ta huy (mas o menos 6.5 miyon).
Aruba, como parti di Reino Hulandes, ta un destinacion popular pa Venezolanonan cu ta busca proteccion. Ademas di su cercania, cu ta apenas 24 kilometer for di Falcón, Venezuela, tambe tin lasonan social, economico y historico cu ta atrae Venezolanonan. Pa juni 2023, e cifra di Venezolanonan na Aruba a yega na 17.000.
