Calamidad medico mester wordo eradica na forma urgente
*Despues di Covid-19 peliger di cigaria electronico ta conoci
*Destruccion di salud di hubentud ta manca futuro di e pais
ORANJESTAD(AAN)—Na caminda pa 2024, Aruba tin suficiente motibo pa lansa un campaña total contra Vaping, e cigaria di Era Electronico mundial.
Cuanto placa mundo mester inverti pa atende cu adiccion cu ta destrui capacidad humano pa disfruta di bida y aporta na mundo, ta bini dilanti den e guera di hende contra droga y tur loke ta bira adiccion.
E afan y cultura cu a wordo crea na planeta Tera pa hende, a haci hende esclavo di tendencianan cu ta wordo introduci, manera e palabra “adicto” ta confirma.
Hende ta dicidi pa su mes segun democracia pero dirigentenan di un comunidad den tur sector, tin e deber pa cera porta contra peligro cu ta wordo forma pa calidad di bida y hasta bida di hende, cu resultadonan cu e tin pa henter comunidad.
Sigur despues di e pandemia di Covid-19, hende ta mucho mas conoci cu e impacto cu su decision tin, ta afecta tur cu ta rondone y asina finalmente henter comunidad.
Leynan social cu a wordo introduci na Aruba, ta haci cu e hende cu ta pone su salud un banda pa e “disfruta”di bida, ta bira peso pa e comunidad sigur na Aruba cu conoce un seguro medico nacional, na cual tur hende cu ta produci placa pa e comunidad, mester participa.
Esaki ta duna motibo logico, pa e ciudadano cu ta cuida su salud, exigi pa otro tambe evita problema di salud, cu aseguro general obligatorio mester cubri.
Cigaria a bira moderno den un tempo, cu falta di conocemento y informacion, a permiti actitud y accion cu a causa problema pa hende directamente.
Kico un infeccion na pulmon ta causa, a wordo demostra pa Covid-19 cu a mata hende y te awe ta un peliger pa hende cu den silencio ta despedi di e mundo, cu ta lubida peliger real di e coronavirus cu a logra mas cu un guera mundial.
E sintomanan di Covid-19 ta similar na e condicionnan cu vaping por produci pa pulmon di hende, cu ta bira manera “popcorn”.
Keintura, malestar, problema respiratorio y tur loke hende lo a cualifica como griep, ta presenta nan mes den e infeccion di pulmon ta resultado di vaping, cu ta destrui hende.
Vaping no por wordo considera un alternativa pa cigaria, pasobra vaping tambe ta destrui salud di hende.
Si un pais manera Merca por a start un guera contra e peligro di e adiccion na huma, tabata pasobra e productonan di tabacco tabata e motibo mas grandi di morto cu por a wordo evita na Merca, cu a registra casi Mey Miyon victima anual di humamento.
E pais tabata tin un gasto anual di casi 300 Biyon Dollar pa atende cu victimanan di humamento.
Ciencia a determina cu Vaping no ta deshaci di e peligro cu humamento tin pa tur parti di curpa humano.
Di mas posibilidad pa infarto di curazon y cerebro, ansiedad, problemanan mental y di circulacion di sanger, victimanan di vaping tin mas chens pa muri.
Morto y mas enfermedad ta producto di vaping, cu ta un forma di adiccion na nicotina, cu hunto cu un vapor di substancianan peligroso manera hasta metal, ta habri caminda pa cancer y otro enfermedadnan mortal.
Vaping ta aumenta presion di sanger y ta afecta e curazon humano pa e forma cu adrenaline ta move den curpa di hende.
Arteria di hende ta wordo afecta y ta cera, loke ta haci pasashi di oxigeno na organonan y tur parti di curpa, mas dificil.
Covid-19 a duna prueba kico problema di salud ta nifica pa henter un comunidad y henter mundo y ta habri wowo pa e realidad, cu hende mester cuida su salud, no solamente pa su bienestar pero enfrente e responsabilidad comunitario cu democracia ta contene pa tur participante na un comunidad.
Si mundo democratico ta actua contra uzo di tabaco, cu tabata uno di e mihor negoshinan na mundo, ta pa rescata salud di hende cu adelanto cientifico cu a costa hopi placa, a entrega na hende cu awor por alcansa edad halto.
Hende tin un deber pa cuida su mes.
Hobennan, cu mas y mas ta wordo considera ciudadanonan capaz pa yuda carga responsabilidad pa futuro, mester sostene e lucha di hende pa adelanto di e ser humano, cu ta cuminsa cu proteccion di su salud cu ta dicidi pa su bienestar!
