Petroleo atrobe na caminda pa $100 pero consumidor ta reacciona
*Mundo ta despedi di un epoca di bonanza crea pa petroleo
*Cifranan Hulandes ta splica e peso financiero di energia limpi
ORANJESTAD (AAN) — Cada rato mundo ta bira mas calor, cu e resultado cu hende mester prepara su mes pa confronta mas malesa cu lo resulta den menos productividad laboral.
E calidad di cosechanan ta wordo afecta manera ya por a nota na 2023, mientras produccion di entre otro carni, pisca, galiña y otro basenan pa cuminsa, tambe ta preocupacion.
Aruba tin un sistema di produccion di awa y coriente, cu hopi pais grandi na mundo lo a desea, manera na hopi occasion DIARIO a mustra. Mas calor lo afecta salud di hende, cu tabata tin hopi problema pa acepta e crisis cu cambio di clima lo a produci y lo sigui produci.
Petroleo ta enemigo di condicionnan climatologico favorabel pa salud di hende, cu mester a dicidi cu ta deshaci di petroleo den un futuro acorda.
For di momento cu Conferencia di Clima a produci e decision pa deshaci di combustibel fosil, di petroleo y gas entre otro, DIARIO a splica su lectornan na salida di e crisis economico di Covid-19, cu e salida di petroleo lo bira un crisis mundial.
Pa comprende loke ta pasa na mundo cu mester despedi di petroleo, mester bolbe na e momento cu Aruba a despedi di Lago na 1985.
Aruba na e momento, a despedi di e industria cu a habri porta pa un economia na e pais.
Refineria a haci Aruba importante, manera tabata e caso cu mayoria di pais, cu a conoce un economia vibrante nobo cu entrada di e industria petrolero.
Ta den e industria petrolero ta sconde e factornan cu a conduci na Aruba como destino turistico, cu a sigui crece sigur durante e ultimo Bestuurscollege di Teritorio Insular Aruba, cu a habri porta pa turismo por a bira e pilar economico importante.
For di e momento cu Lago a cera su porta, Aruba a sigui busca un forma pa duna bida nobo na e refineria, cu a bira victima di e situacion internacional den mundo petrolero cu a mira cambionan mundial den sector petrolero, cu ademas di placa a produci guera y mas guera y confrontacion mundial.
DIARIO semper a mustra riba e curashi cu Prome Ministro Evelyn Wever-Croes mester tabata tin pa admiti cu reanima Lago den e situacion mundial nobo, mester a wordo bandona ora e compania Quanten tampoco por a duna resultado.
E tempo di refineria a pasa, tabata e mensahe di Prome Ministro Evelyn Wever-Croes cu a adapta economia di Aruba na futuro di gas y despues hydrogeno.
Aruba tabata tin suerte cu Gobierno Wever-Croes no a permiti Aruba pega den loke futuro lo a trece, manera awor ta bini dilanti.
DIARIO cu for di 2021 a splica kico salida di petroleo lo tabata tin como resultado, a mustra for di entrada di 2023, cu guera di petroleo a culmina y cu interesnan mundial ta confronta otro riba tereno di petroleo, cu prome cu su salida mester produci placa.
E tension cu Aruba a conoce ora Lago a cera su porta, ta e tension cu mundo conoce actualmente.
Mundo mester bandona e seguridad financiero di petroleo, cu a percura no solamente pa potestadnan economico mundial, pero tambe pa economianan funciona.
Na Hulanda actualmente discusionan ta tuma lugar entorno produccion di energia limpi pa medio di mulinanan di biento den laman. Gobierno Hulandes ta papia di e sumanan enorme cu mester pa inversion y e gastonan cu esaki lo nifica pa habitantenan di Hulanda.
Na salida di 2023, prijs di petroleo ta bira amenaza pa comercio mundial den otro sentido.’
Cu tanto problema na mundo, hende a cuminsa atende cu cambio. Expertonan financiero y economico mundial ta indica, cu mundialmente publico ta ahusta su mes na e situacion cu a surgi cu aumento di prijs di petroleo.
Consumidornan rond mundo, ta cuminsa ahusta na e prijsnan di petroleo cu ayera a bolbe subi y atrobe ta amenasa di alcansa 100 Dollar pa baril.
Prome reaccion di expertonan ta, cu e consumidor a cuminsa reacciona y segun investigacionnan internacional ta vigila con e ta gasta su placa cu resultado cu prijs di petroleo lo por influencia comercio internacional no solamente cu prijs mas halto pa transportacion.
Expertonan ta adverti pa sigui subi prijs di transportacion ya cu aumento di prijs ta baha e volumen di benta di productonan y servicionan.
DIARIO ta vigila tur desaroyo na entrada di e temporada halto di turismo na Aruba, cu awe tin e salida di Lago y caida di economia Arubano como ehempel pa e panico mundial cu ta genera tur e problemanan actual na salida di petroleo, cu a cambia poder economico mundial!
