Pa provee cunukeronan y criador di bestia cu awa:
ORANJESTAD (AAN): Señor Alfredo Koolman, director di WEB Aruba N.V, den conferencia di prensa a elabora riba e prolongacion di 'intentieverklaring' of acuerdo di compromiso, un acuerdo relaciona cu suministro di awa pa personanan cu ta dedica na agricultura y cria di bestia.
Koolman a señala cu en berdad na aña 2022 WEB a bin cu un acuerdo cu gobierno y LVV (Santa Rosa), pa ofrece un solucion na e cunukeronan y criadornan di bestia.
El a expresa cu ta evidente cu na Aruba ta carece di suficiente awa pa agricultura, cria y horticultura, y e ta pensa cu WEB a bin cu un bon solucion, y semper ta keda pensa ki otro solucion por bin cune, manera transporte cu ta un reto.
El a bisa cu e creatividad di WEB a bin cu e suministro di awa pa agricultura, semper y cuanto ta cumpli cu e rekisitonan. Nan ta haya e awa via nan tuberia, y a base di e procedure cu nan a aplica na Santa Rosa y na WEB, a haya un meter dedica na esaki y tin un tarifa special. A base di esaki, Koolman a splica, tin un bon cooperacion cu Santa Rosa e ultimo añanan aki, y periodicamente WEB ta haya informacion di Santa Rosa, y nan tambe ta suministra informacion di forma cu nan ta wak e efectividad di e programa aki.
El a agrega cu, cu hopi placer nan ta extende e intentieverklaring aki, cu dos aña, cu e proposito cu despues di dos aña nan yega na un acuerdo final, unda cu pa mas aña WEB por duna su contribucion na e sectornan importante pa Aruba.
Cu placer, Director di WEB Aruba, Alfredo Koolman, tabata na Santa Rosa hunto cu e Minister pa firma e intentieverklaring, pa dos aña mas. El a gradici e team di Santa Rosa y tambe su coleganan di WEB cu pa Dia di Alimentacion, nan por a firma e intentieverklaring menciona.
{gallery}Director di WEB Aruba NV, Minister Ursell Arends y Santa Rosa{/gallery}
