Randall Croes: Comerciantenan cu mesun opinion -- ORANJESTAD (AAN): Un topico cu ta den medionan di comunicacion rond mundo ta esun di e 'supply chain' of cadena di suministro cu ta wordo afecta grandemente na e momentonan aki.
Riba esaki e economista y tambe miembro di Comerciantenan Uni (CUA), Randall Croes, a papia extensamente durante un entrevista cu Aldrich Croes den e programa Entrevista di Dia na Hits100FM.
Un di e temanan cu a bin dilanti ta cu e comerciantenan na Aruba a pidi gobierno coopera y no cobra invoerrechten riba flete mirando e prijs halto di e containernan.
Croes a bisa cu e mihor solucion ta pa pone un prijs husto di loke un container di 40 pia ta bal, a base di e averahe di prijs di 2019 y 2020 y bisa "container di China bal 8 mil dollar y ta pone 8 mil dollar plus e factura y cla. E ora gobierno no ta perde placa, pero gobierno ta keda sin cobra ariba container cu a subi di prijs pa motivo speculative".
E prijs aki no ta un prijs real, sino un prijs cu ta bay dura algun luna y despues ta bay, Croes a remarca.
E ora gobierno ta keda ricibi e placa cu normalmente e ta haya calculando un prijs di container.
Randall Croes ta mira esaki como un solucion. Un container aftrek riba un model.
El a laga sa cu e comerciantenan tin e mesun opinion cu mester bin un manera pa pueblo no bay paga pa speculacion di compania di carga, sino paga e mesun invoerrechten di antes of mantene un averahe di prijs pa loke ta e invoerrechten. Pero esey ta e costo di e comerciante. Pero e prijs di e container mas caro, no ta kit'e for di e prijs di comerciante pa pone e producto den su shelf, e economista a splica.
"E inflacion ey nos tin cu bay absorb'e, tambe nos patronchi di consumo y contribui pa e demanda no ta mucho halto pa bo budget familiar keda den balansa. Purba di cumpra awor cu ta na tempo cosnan manera aroz, bonchi, habon, cosnan cu ta dura hopi mas tempo cu ainda nan prijs no a subi hopi", a bisa.
Un bes cu e temporada di Pasco y cuminsamento di aña pasa, winter pasa, e situacion ta bay cuminsa 'slowdown' y normalisa ya cu e no ta bay keda pa semper, e economista a indica.
