ORANJESTAD (AAN): Director di Fundacion RESPALDO, Psikiatra Dr. Hendrikus van Gaalen a indica cu adiccion ta comporta mescos cu cierto malesnanan.
E ta cuminsa jong hopi biaha y asina mes mester cuminsa traha riba prevencion pa laga hende bira conciente cu nan por haya un adiccion, e psikiatra a remarca.
Poco poco un persona ta cuminsa experimenta. Haya un tiki aki, un tiki aya y ta keda haci esey sin sa cu den futuro por bira adicto, a bisa.
Tin diferente terapia, pero mas importante cu esey ta pa crea un bon dominio social y esey kiermen cu e isla mester ta asina leu cu e muchanan y otro hendenan no mester di droga pa kita nan stress.
Scolnan ta hopi importante pa identifica e 'red flags' ora cu por ehempel un mucha ta keda leu di scol of comporta diferente. E ora mester pone e mayornan of esnan cu experticio sa kico ta pasando.
No ta un specialidad di RESPALDO, a remarca. Ta un specialidad di Fundacion pa Maneho di Adiccion (FMAA) pa duna guia y den esaki kier coopera cu nan mas y mas.
Hopi mucha y hoben ta pensa marihuana ta un cos natural y no ta un problema. Un hende cu ta uza marihuana por bira floho, psicotico, haya problema cu concentracion, memoria.
Alcohol ta un droga hopi venenoso y door cu esaki por haya cierto sorto di cancer, Dr. van Gaalen a splica.
Mester admiti cu e problema di alcohol, droga y otro adiccionnan ta importante na Aruba. Gaming tambe ta un adiccion y tur adiccion mester wordo atendi ya cu si no ta haci esey hopi hende ta bay atras, e medico a enfatisa.
Dr. Van Gaalen a felicita FADA pa su bon trabao di prevencion pa loke ta adiccion y FMMA.
