Debate a duna tur oportunidad pa el a presenta prueba pa acusacionnan cu el a lansa - *Pakico Marisol no a bay Ministerio Publico pero a yora pa e por a keda Ministro? - *Cuanto tereno e Cas di Madushi tin y pakico mester di brug pa un cas cu ta basha abou?
ORANJESTAD(AAN)—E edicion di analisis di awe originalmente tabata destina pa hunto cu Pueblo repasa tur e pruebanan cu Marisol mester a presenta for di 2020 na autoridad y awor sigur den e debate di Camara di Comercio.
Awe ni autoridad ni publico cu a sigui e debate, tin un prueba den su man di tur loke Marisol Lopez-Tromp a tira como acusacion contra Gabinete Wever-Croes ora POR a pidi Marisol debolbe e partido cu a pone na poder, e puesto di Ministro.
E drama cu Marisol a presenta den Parlamento di Aruba tabata algo unico. Si no tabata pa partido POR, e lo no tabata presente den partido POR pa e por a bira Ministro pa Partido POR, ora salida di Otmar Oduber a crea e necesidad aki.
Ta pasobra Marisol Lopez-Tromp voluntariamente kier tabata parti di partido POR y a keda cu Partido POR, el a bira sucesor di e partido den e coalicion cu el a sostene y di cual e kier a keda Ministro.
E ultimo estadia di Marisol Lopez-Tromp den Conseho di Ministro, segun pruebanan cu DIARIO a presenta, a crea ocasion pa e por a sigui duna prioridad na interes di su famia cu e forma cu el a atende cu e tereno pa su ruman Lelicia cu ta parti di su partido di turno, miho bisa su di cuatro partido a base di cual e ta presenta su mes na publico.
Despues di loke a pasa na 2020 cu Marisol Lopez-Tromp, den e debate di Camara di Comercio, sigur nos a pensa hunto cu un parti grandi di Aruba, cu porfin Marisol lo a presenta prueba pa tur tipo di acusacion cu el a laga colga den aire politico na Aruba.
E furia cu cual na 2020, den pleno pandemia, Marisol a lansa e impresion cu e tin cantidad di prueba contra di cantidad di politico, a haci hende kere cu e documentonan cu nunca el a entrega na autoridad, lo a wordo presenta na publico durante e debate.
Kico a pasa cu e pakete di acusacion di Marisol cu a crea e impresion cu e por basha e mundo politico di Aruba abou? Pakico te awe e no a haci loke ley ta exigi pa un hende haci ora e tin prueba di algo cu ta contra ley?
Ley ta bisa cu ora un persona ta na haltura cu algo contra ley a sosode, autoridad mester ricibi prueba di esaki pa e por haci su trabou y pone un fin na loke ta malo.
For di 2020 nos ta pendiente di e pakete di Marisol pa nos analisa kico a pasa segun e documentonan cu el a crea e pensamento cu e tin y cu ta acusatorio pa personanan den mundo politico di Aruba y sigur e miembronan di coalicion cu a pidi Marisol pa baha como nan Ministro.
Ora nos haci un analisis di ultimo parti di e fenomeno Marisol den politica di Aruba, nos ta sigui busca na prome luga pues un contesta pakico Marisol no kier a bandona e gobierno cu segun e impresion lo a haci cos cu no ta bon. Pakico Marisol kier a keda den e Gobierno cu el a respalda for di 2017?
Pakico ora el a baha, e no a presenta e pruebanan cu e tin contra e gobierno cu segun Marisol a bisa, no ta bon. Kico a pasa cu e pruebanan? Pakico el a tene nan su secreto?
Awe ta cu pregunta tras pregunta nos ta trata di analisa e fenomeno Marisol cu ta enfrenta eleccion cu dos secreto. Pakico e Cas di Madushi tabata tin mester di un brug, pa a permiti e cas basha abou?
Pakico Marisol no a bay autoridad pa denuncia e Gobierno cu e no tabata kier a bandona?
Nos conclusion ta cu si di berdad Marisol tabata e politico di haltura cu e kier pa Pueblo kere cu e ta, lo el a splica e luga di Cas di Madushi den su bida y lo el a bay autoridad y bay cu prueba entrega keho contra e gobierno di cual e mes tabata forma parti y cu e no kier a bandona!
