ORANJESTAD (AAN)-- Ronald van Trigt, Presidente di e Comision cu encarga di traha e rapport tocante gastonan di cuido medico, y cu nan a yama “Cuido di nos cuido”,
a agrega den conferencia di prensa cu, como presidente di e comision, aunke AZV y representantenan di e Ministerio di Salud, oficialmente no a forma parti di e Comision aki, nan tambe door su persona a wordo pidi pa duna comentario, riba e proposicionnan cu e sector di cuido a bin cune.
Y den e rapport e ta referi tambe na e posicion di e personanan aki y e kier a gradici tambe AZV, y tambe esnan cu ta representa e Ministerio di Salud.
Finalmente, el a expresa cu e cambionan cu a wordo treci dilanti den e rapport “Cuido di nos cuido”, mester tin e sosten di tur gremio y henter e comunidad di Aruba. No solamente e sector salud, cu ta presente, pero tur esnan cu mester carga e consecuencianan di e cambionan cu nan ta visualiza mester wordo envolvi den un discusion nacional riba con esaki ta sigui: dunador di trabao, sindicato, gobierno mes, AZV, diferente departamento di salud, pasobra un plan asina mester tin un coordinacion entre tur e hungadornan den cuido y tambe gobierno, pa duna direccion den implementacion di un cambio structural den e cuido aki.
Un bez mas Van Trigt a gradici tur e dunadornan di cuido, cu apesar cu nan tin un tarea hopi duro tur dia, y specialmente durante e temporada di Covid aki, tabata un esfuerzo enorme di nan banda pa toch bin cu un rapport unda henter e sector aki por a para su tras.
Como conclusion, van Trigt a bisa cu e decision cu a wordo tuma door di Gobierno di Hulanda, a crea den nos comunidad basta reaccion y no ta por nada. “E motibo pa cual mi ta bisa esey, ta cu no tin un base cu ni e sector di salud, ni AZV, ni gobierno por a pensa e motibo specifico pakico e condicion aki a wordo impone, exactamente, riba Aruba.
“Aruba prome cu e pandemia tabata tin un sistema di salud cu hopi hende y tur Arubiano, mester ta orguyoso di dje. Y nos a mustra esey, durante e periodo di Covid-19. Mas asombroso ta, cu na momento cu esaki a wordo impone riba Aruba, e no a wordo impone riba e otro islanan, cu nan sistema di salud ta hopi mas caro. Por ehemplo, na Curacao na e momentonan aki, e sistema di salud ta hopi mas caro cu e sistema di Aruba. Pues, eynan tambe e pregunta pakico Aruba, specificamente, a wordo scogi pa esaki. Esaki ta preguntanan cu te ainda nos no tin contesta riba dje, aunke cu nos a puntra, aunke cu nos a haci, aunke nos kier a haya sa, nunca por tabata tin claridad completo riba esey”, Ronald Van Trigt a bisa pa conclui.
