Sietske van der Wal di ACF:
ORANJESTAD (AAN) Señora Sietske van der Wal, Funcionario di ACF (Aruba Conservation Foundation), den entrevista cu DIARIO tocante Biodiversidad y areanan natural cu mester designa como areanan proteha, a señala cu opcionnan tin hopi, pero esey ta un decision cu por tuma di un dia pa otro.
“Awo nos a inicia e proceso. Nos tin Blue Marine Foundation cu ta yuda cu esey pasobra nan tin un monton di experiencia den esaki, y den busca e solucion cu por funciona pa tur hende; nos tin Departamento Natuur & Millieu (DNM) cu mester prepara e documentonan pa esaki por formaliza como ley, Aruba conservation Foundation, tambe lo asisti a base di nan experiencia como manehador actual di e Parke Marino”, señora van der Wal a señala.
Señora van der Wal a agrega cu pa motibo cu tin deseo pa mas desaroyo den lama, ta hopi importante pa nos tur aliña y bin cu un structura.
“Manera nos tin ROP y ROPV riba tera, unda ta bisa ‘esey ta pa turismo, esey ta pa running, esey ta pa naturaleza’ nos tin cu bay haci algo similar den lama. Anto, e ora ey e ta bay bira mas duidelijk ora kier haci un proyecto, unda esey por sosode. Aworaki den lama, hopi biaha e proyecto ta bin ariba, unda mester hacie; eigenlijk ningun hende sa, anto bo no por haci nada definitivo, pasobra e no ta asigna ainda. Claro, ta mas practico pa wak si e mesun modelo cu a wordo traha awo ta fix den e deseo, pero si ta resulta cu esey no ta e caso, anto mester hal’e afo”, segun señora Sietske van der Wal, di ACF, a splica.
