Encuentro Exitoso di Soroptimist International Club of Aruba cu diferente profesional y organisacion

Señora Magaly Maduro di SICA:

ORANJESTAD (AAN): Diamars anochi, Soroptimist International Club of Aruba (Sica) a tene un encuentro cu diferente professional, miembronan di diferente organisacion y algun Parlamentario pa comparti informacion riba e simposio cu lo tuma luga dia 7 di maart 2026, den conexion cu Dia Internacional di Hende Muhe. 

Señora Magaly Maduro di Sica, den un entrevista cu DIARIO a splica cu e encuentro tawata enfoca riba e tema central di e simposio: trauma, un realidad cu ta toca hopi hende, specialmente hende muhe, y tambe riba diferente problematica social cu ta afectando nos comunidad na Aruba. E intercambio di idea y experiencia a pone enfasis riba e necesidad di mas conscientisacion, educacion y colaboracion structural pa enfrenta e desafionan actual cu determinacion y vision. 

Segun señora Maduro, e meta di e reunion tawata pa motiva e organisacionnan presente pa anima nan miembronan y rednan pa participa activamente den e simposio. Sica ta kere cu conscientisacion y encuentronan asina ta pasonan esencial pa kibra silencio y crea un comunidad mas fuerte y resiliente. 

Soroptimist International ta un organisacion mundial dedica na mehora bida di muhe y mucha muhe via educacion, liderazgo y empoderamento. Localmente, Sica ta activo durante henter aña cu diferente proyecto, campaña y eventonan cu tin como meta pa crea oportunidadnan, brinda sosten y impulsa cambio positivo duradero. 

Sica ta invita henter comunidad, homber y muhe, pa bin forma parti di e simposio dia 7 di maart. Cu e simposio aki, Soroptimist International Club of Aruba ta reafirma su compromiso pa sigui traha di forma consistente y strategico na bienestar di e hende muhe na Aruba y crea espacio na unda temanan relevante y urgente por wordo trata cu seriedad y profesionalismo. 

Ademas, Sica ta anima pueblo di Aruba tambe pa bira miembro y forma parti di e movimiento aki cu ta pone dignidad, resiliencia y progreso na centro di nos agenda social. 

Pa mas informacion y reservacion pa e simposio, contacta señora Magaly Maduro na telefon 561-9100.