Señora Dalgis Montalvo di Stichting Hunto:
ORANJESTAD (AAN): Señora Dalgis Montalvo di Stichting Hunto, den un entrevista recien cu DIARIO a enfatisa cu no mester warda te ora cu e problematica di adiccion y suicidio ta asina grandi na unda cu e ciudadano cu e problemanan di adiccion of cu pensamentonan di suicidio ta sinti su mes den un skina unda ya e no ta mira un salida. Comunidad, famia, organizacionnan y Gobierno mester hunga un rol mas proactivo pa preveni y atende situacionnan asina.
Segun señora Montalvo, na Aruba tin hopi hoben den adiccion como tambe cu problema cu husticia pa diferente motibo. Hopi hoben como adulto ta sufri di depresion y ansiedad y no sa con pa deal cu e situacion. Tambe tin e problematica na unda adultonan no tin sosten di mayornan, yiunan of famianan mas. Tur esakinan ta factornan serio cu ta contribui na e problematica, y cada caso ta rekeri un tipo di guia y intervencion diferente.
Stichting Hunto ta kere firmemente cu prevencion, amplia e ekipo profesional y actua pronto, prome cu e situacion bira mas grave, mester keda prioridad pa proteha y guia nos ciudadanonan.
El a agrega cu, loke ta trata e parti di adiccion, fundacion ta ricibiendo mas personanan nobo, mayoria hoben. Segun señora Montalvo, awendia, hopi hoben no por of no sa con pa enfrenta e problematicanan cu nan ta topa, ni ta haya e guia adecua. Hopi biaha nan ta perde speranza y ta tuma decisionnan drastico en bes di purba un tiki mas. Esaki ta un señal alarmante cu, si no ta atende cu urgencia, por sigui crece den nos sociedad.
