ORANJESTAD (AAN): Riba Diaranson den Parlamento a keda trata otro medida di Gabinete Wever Croes.
Ta trata di e asina yama Landsverordening Belastingsplan 2023 parti 2. Den e ley aki ta reglamenta 7% BBO na frontera.
Segun Mervin Wyatt-Ras di AVP, e efecto di BBO na frontera riba nos turismo lo bira bisto. Aruba ta y lo bira mas caro, locual lo influencia nos posicion di concurencia na un forma negativo. AHATA y comerciantenan uni y ATSA tambe ta indica cu “Aruba is positioning itself as very expensive in the competitive tourism landscape and pricing itself out of a successful industry”.
Pero ta obvio cu gobierno ta tuma medida pa cumpli cu landspakketten cu Evelyn Wever-Croes a firma cu Hulanda. Asina el a bende nos autonomia y tin cu cumpli cu loke el a firma.
Ta danki na gobernacion di AVP awe tin un ATA y fondo di turismo cu a haci posibel cu nos turismo apesar di tur adversidad a keda cu cabez riba awa. Enbes di bin cu medida ta necesario considera pa aumenta compliance. Paso medida ta mas tanto dirigi riba esnan cu ya caba ta cumpli y consumidornan. A menciona den reunion cu AZV/SVB cu no ta haya suficiente entrada di BAZV pues unda e suma aki ta bay cu no ta drenta den caha di AZV?
Raad van Advies ta ripiti loke el a bisa anterior ora a trata e ley di Belastingplan parti 1 cu tin un gobierno cu no ta betrouwbaar pues cu no ta carece na confianza.
Ta keda cu gobierno intransparente aki no ta envolvi gremionan sindical mientras e sa cu e consecuencianan ta devastador. Asina a haci tambe ora di landspakketten. Evelyn Wever-Croes y su secuasenan a firma sin consulta cu niun hende. Awe nos famianan humilde, nos grandinan, comerciante, panadero, hoteleronan, hoyeronan, y nos muchanan tin cu paga pa Evelyn y su gobierno burdugo. Mientrastanto gobierno si ta sigui gosa cu nan friends and family, autonan di luho, biahenan tur rond di mundo, hasta Dubay nan a yega. Falta so pa yega Noordpool. Mientrastanto pueblo cu ta bira cada dia mas pober ta pasivo cu miedo pa e gobierno cruel aki.
E ley en cuestion ta un otro atraco riba cartera di nos ciudadano. Un ley pa haci nos ciudadanonan ainda mas pober. Por a tende di gobierno cu e ley no ta afecta niun hende. Esaki ta un mentira flagrante. Dicho gobierno no ta drenta supermercado pa sa kico pueblo ta en contra. Mep-RAIZ ta desconecta cu pueblo.
Segun Wyatt-Ras, den tempo di AVP tur hende por a mira y ta gosa di e proyectonan manera Green Corridor, Watty Vos Boulevard, MFA’s den diferente bario, tur e diferente reparatietoeslag en school kinderentoeslag. Etc. Ey e placa a bay, esta pa nos hendenan. Awor aki ta culpa AVP y gobierno no kier baha su gastonan di luho. Esaki ta e realidad na Pais Aruba.
E ley a ser aproba door di coalicion. Rabonan a dobla. Fraccion di AVP a presenta un mocion pa desaproba cu no tabatin dialogo real cu gremionan sindical, comercial y pensionadonan. Dicho mocion a ser sostene door di oposicion. Finalmente e 11 parlamentario den coalicion a stempel e ley aki cu lo masacra nos pueblo sin cu gobierno ta corta den su propio gastonan.
