Stella Geerman, Mentor di adulto mayor di “FMTB”:
ORANJESTAD (AAN) – Stella Geerman, hunto cu Ingrid Croes, ta e mentornan pa e proyecto di Hunto Grandi, Grandi Hunto, pa clientenan di FMTB. Aña pasa nan a organiza un tayer di trabao yama: “Con pa lanta grupo” y “Con pa guia grupo”, y den un evaluacion di e grupo cu a participa nan a expresa cu nan kier haya un tayer di “Con pa tene buki” den nan organizacion. Asina Stella Geerman a comenta den un entrevista cu DIARIO.
El a comenta cu gruponan di hende grandi ta hunga un papel hopi importante den e bida di e pensionado, pues di esnan cu no tin trabao y ta keda hopi na cas. Pero door di uni na un grupo, nan ta sali di nan soledad, ta topa amistadnan, ya cu hopi amistad ta cay afo ora nan ta bira grandi, y tin cu busca otro amigonan y otro coi haci.
“Dirigentenan di e gruponan ey mester di mas conocemento, pasobra no tur boluntario tin e conocemento specifico riba cierto trabaonan cu e comisionnan mester. Pues, ‘tene buki’ ta un trabao hopi importante den e administracion di e miembronan, di e donacionnan cu ta haya. P’esey aworaki nos a haya un señora Maria Croes, cu ta pensionado tambe y el a facilita nos e informacion ey, pues hunto nos ta hacie”, Geerman a duna di conoce.
E participantenan den e tayernan di trabao ta haci pregunta, un ta siña di otro, tin diferente grupo y sistema di tene buki, y mester empodera e miembronan boluntario pa nan sigui tras di e informacion pa e grupo.
