MIAMI: E pandemia aki a trece varios dolor di cabez! Tin scarcedad di material pa asina fabrica hopi parti di auto, y uno di nan ta scarcedad di parti di sistema di muffler di auto.
Esey a pone cu aworaki Merca ta conociendo un aumento drastico di ladronicia di sistema di muffler di autonan, specialmente esnan di vehiculo SUV.
Tin scarcedad di Catalytic Converter, y esey nifica cu awor hendenan ta pagando extra mas hopi Dollars pa por haya esaki cumpra. Y ladronnan ta subiendo caya pa busca autonan staciona nan so, y cu djis un zaag y dos minuut di tempo, nan ta sali bek cu e pieza aki cla pa bay cune, y re-bende esaki.
Algun ciudadano ta hasta birando victima pa di dos biaha cu nan auto ta keda sin e sistema di muffler aki durante e pandemia.
E ta un crimen cu tabata existi pa algun tempo caba, pero e tabata algo sporadico. Pero awor el a lanta cabez y e cantidad di casonan denuncia na autoridad na Merca ta kibrando record. Criminalnan ta busca e metal valioso aki cu tin den e pieza aki pa bende riba mercado preto, y cu nan por haya varios cien Dollar pe.
Desde cu e pandemia a cuminza, ladronicia di Catalytic Converter a aumenta tur caminda na Merca. Esey ta bin debi cu scarcedad di metalnan raro ta pone prijs subi, y e aparatonan aki ta bira algo atractivo.
E ladronicia di e Catalytic Converter por laga victimanan cu un vehiculo ta sona masha duro mes, y cu por costa te cu $3.000 pa drecha, y esaki no ta wordo cubri door di Aseguro.
Catalytic Converter ta yuda controla emision di vehiculonan. E ta converti gasnan toxico y material di polucion, den vapor di awa y monoxido di carbon. Nan ta poni mey-mey di e motor y e muffler. Ladron ta horta facilmente di vehiculonan ‘halto’ manera SUV, Pickup, y Van. Prome cu 2018, tabatin un promedio di 108 ladronicia pa luna na Merca. Na December 2020 esey a yega na 2.347 pa luna. Di Januari pa Mei 2021, ladron a horta 26.000 di nan.
