Honor inespera presenta na John Freddy Tobón Montoya

ORANJESTAD (AAN): Recientemente durante e certamen di Miss Teen Aruba International 2021 teni den Cas di Cultura,

inesperadamente e presentador George Winterdaal a indica cu nan tin un honor y reconocimento special pa un persona cu ta den publico e momento ey.

   Winterdaal a splica cu durante tur tempo cu GLW Foundation ta organizando e certamen aki, semper cu nan pidi e ‘persona’ ey un yudanza den cualkier aspecto di organizacion pa e evento di beyeza aki, semper nan ta haya yudanza di e persona aki.  Pesey mes e organizacion a dicidi, cu e momento a yega pa mustra nan honor y aprecio, pa e bon curazon y e deseo di duna un man ki ora cu ta.

   Esey a resulta di ta John Freddy Tobón Montoya, kende tabata den publico y a keda asombra cu esaki.  Nan a pidi’e pa e subi escenario y el a haci esey pa asina ricibi un plaquette traha den un forma peculiar y artistico estilo un druppel.

   Por a nota riba cara di John Freddy Tobón Montoya cu el a aprecia esaki inmensamente.  Aunke e no a nace na Aruba, e ta un persona cu ta sigui empuha cultura di Aruba na cualkier momento cu e haya chens.  Y pesey mes, DIARIO a nota cu el a keda contento cu e cariño y aprecio aki, y a hasta hisa su regalo den halto pa mustra tur hende den sala, e bunita aprecio aki.