Vuelo for di Hulanda sin medida di precaucion pa Covid-19:
ORANJESTAD (AAN) — Un ciudadano cu a bin Aruba den un vuelo for di Hulanda, a tuma contacto cu mesa di redaccion pa mustra su preocupacion cu algo cu el a experiencia tanto durante e vuelo como na su yegada na Aeropuerto Reina Beatrix.
Na prome lugar, el a comenta cu aunke e tin su dos vacuna contra Covid-19 na Hulanda el a purba haci e test di Covid, mirando cu e variante Delta ta halto na Hulanda y cu por afecta hende cu ta vacuna tambe, y cu incluso Hulanda ta e pais cu mas caso y alerta cora di Europa, pero aya e rijnan pa test ta hopi largo y el a wordo aconseha pa miho hacie na Aruba cu ta basta mas barata cu na Hulanda.
E prome impresion desagradable cu el haya ora el a subi avion ta cu ningun otro pasahero tabata usando tapaboca y no tabata tin control abordo tampoco. E ta haya masha straño esaki, pasobra e vuelo tabata yen, y e no a mira cu prome cu aborda a pidi e pasaheronan un prueba di vacuna of di test (test ta obligatorio pa drenta Aruba).
Algo berdad straño, pasobra informacion cu tabata wordo duna pa autoridadnan local ta otro.
Ora a baha na Aruba y drenta Imigracion, tampoco a wordo pidi prueba di vacuna ni a controla si a test Covid of no.
Tan pronto el sali for di aeropuerto a bay busca un laboratorio pa haci e test y el a kere cu ta bay haya un rij largo aki tambe, pero no tabata e caso.
E momento ey e so a bay haci test, cu enberdad aki ta mas barata cu na Hulanda y tambe cu na Merca.
E ciudadano ta haya cu e situacion aki, sin ningun control ta hopi peligroso, y e ta puntra su mes kico ta bay pasa ora cu e hendenan local, tanto Arubiano como residente, cu a bay afo cu vacacion na diferente pais, bolbe Aruba y no ta wordo controla?
Apesar cu e tin tur dos vacuna, mirando e falta di control aki, vooral na Aeropuerto Reina Beatrix, e ciudadano ta sinti su mes hopi insigur na Aruba.
NOTA DI REDACCION: Esnan cu ta bin for di Hulanda, aunke nan a haya nan vacuna contra Covid-19 mester haci test di Covid-19 prome of ora di yega Aruba (na aeropuerto mes). Esaki ta mandatario ya cu ta para den e Ministeriele Regeling, ya cu Hulanda ta cay den e lista di paisnan cu risico cu a keda publica recientemente.
DIARIO a haya sa cu den e dianan aki, KLM tin te hasta dos vuelo diario pa Aruba, entre diabierna te cu diadomingo, mirando e cantidad di hende cu ta bulando pa Aruba y for di Aruba pa Hulanda.
Potret: E demanda di viahe pa Aruba y Hulanda ta halto den e dianan aki y pesey KLM mester a pone dos vuelo disponibel riba cierto dianan.
