Parlamentario Ricky Hoek (MEP):
- E unico partido politico democratico na Aruba cu ta eligi su lider pa medio di un congreso
ORANJESTAD (AAN): Riba e fecha 9 di februari 1971, Movimiento Electoral di Pueblo (MEP) a keda funda door di Betico Croes den feliz memoria na su propio cas. Parlamentario Ricky Hoek a indica cu actualmente MEP ta e unico partido politico democratico na Aruba cu ta eligi su lider pa medio di un congreso.
Durante e congreso e sostenedornan ta vota pa e candidatonan cu a postula nan mes pa ta lider di e partido geel. Desde 1971 e mision di MEP pa sali na vanguardia di pueblo a cuminsa.
Durante añanan 70 y 80 MEP a uni e pueblo Arubano cu awe gran mayoria di nos tur ta forma parti di dje. Pa 53 aña largo MEP su vision y mision ta pa Aruba cana y traha nos mesun caminda di progreso, usando tur e oportunidadnan cu tin pa asina crea e bida cu nos mes ta desea. E mision di MEP ta sigui te cu e dia di awe.
Durante cinco decada MEP a conoce 3 diferente lider, diferente candidato y diferente politico tanto den e funcion di minister of Parlamentario.
MEP a crea un union bou di habitantenan di Aruba cu a kere firmemente den e autonomia di nos pais. E pueblo Arubano cu a crea su mesun caminda durante e ultimo 38 añanan di nos Status Aparte. MEP ta e vehiculo politico cu ta brinda tur ciudadano e oportunidad pa den union y comprendemento traha nos caminda, traha na nos progreso y crea e bida ideal cu nos ta desea.
Di e forma aki Aruba tin un Movimiento Electoral di Pueblo cu durante 53 aña a pone su mes na disposicion di su pueblo pa e pueblo ta esun beneficioso.
"Palabra di felicitacion na lider di Movimiento Electoral di Pueblo, na su ministernan, su parlamentarionan, candidatonan y sostenedornan cu e empuhe cu nan ta duna na e partido prestigioso aki", Ricky Hoek a expresa.
