Solange Tchong, Relacionista Publico di AZV:
ORANJESTAD (AAN) – Solange Tchong, Relacionista Publico di AZV, den entrevista cu DIARIO a declara cu berdad e ley di AZV ta stipula cu como asegurado, e persona mester identifica su mes como tal y mustra cu e tin un poliza valido.
El a trece dilanti cu na December 2029, AZV a cuminza introduci gradualmente carchi digiZorgpas, kiermen e Zorgpas digitaliza di AZV. Esaki e persona por haya door di download via google play, of app, y por registra eyriba y tin e Zorgpas app.
“Esaki nos ta stimula y nos tin e bon noticia, cu nos ta yegando casi 80.500 caba cu entretanto tin e AZV app caba, y ta usando esaki, locual nos ta invita pa uza activamente, keda haci uso di dje, wak e notificacionnan, den dje pasobra bo mester di dje cualkier momento”, Solante Tchong a señala.
El a subraya cu malesa ta bin na cualkier momento y pesey ta importante pa aseguradonan tin e prueba cu ta asegura na AZV.
Tchong a indica cu enberdad AZV a dura un par di aña y ainda ta stimulando e clientenan pa nan tin e AZV app. “Aworaki cu e 80 mil clientenan cu nos tin, nos falta otro grupo chikito ainda, y nos ta evaluando si e ta un opcion di no laga solamente aseguradonan desde 18 aña bay ariba download e aplicacion di AZV, pero tambe si mester baha e edad, vooral cu awendia nos ta wak cu nos hobennan ta hopi habil cu tecnica di digitalizacion, y nos ta evalua si tambe mester atrae e grupo di aseguradonan aki, di un edad un tiki mas jong”, Solange Tchong a menciona.
Tchong a agrega cu nan ta monitorea esaki y na 2024 sigur e ta un topico cu ta keda al caso. “Nos kier pa tur hende ta conciente cu mester tin su AZV app, pa prueba na cualkier momento cu e ta asegura na AZV”, Solange Tchong a reitera.
Solange Tchong a referi den e proceso aki, pa tur asegurado tin su AZV app of su digiZorpas, tambe na e residentenan cu ta asegura na AZV a base di un permiso.
Pa nan mescos ta conta y nan tin cu percura pa cada bez entrega nan peticion na ora, p’asina aki por renova nan seguro di AZV.
