MEP orguyoso cu fondo di Gobierno Wever-Croes II aloca pa deporte ta haci soño di deportista bira realidad

ORANJESTAD (AAN): Siman pasa, Fraccion di MEP a bishita stadion Guillermo Prospero Trinidad pa asina mira e progreso di e trabaonan cu tin andando cu e atletiek baan,

Manera ta conoci e veld di futbol a keda cla, pero despues Gabinete Wever-Croes II a tuma e decision  hunto cu Fundacion Lotto pa Deporte pa inverti tambe den un “state of the art” atletiek baan cu awe ta e unico na Aruba.

   Parlamentario Evelyn Wever-Croes a expresa di ta sumamente orguyoso di e proyecto aki y ta gradici colega Endy Croes cu den su funcion anterior como minister di deporte a pusha asina hopi pa logra esaki pa nos deportistanan. Danki na e fondo cu e gabinete anterior a aloca, awe soño di hopi di nos deportistanan ta bira realidad.

   E proyecto aki lo sirbi como un stimulacion pa nos muchanan y hobennan pa asina ta mas activo den deporte, logrando asina futuro campeonnan pa pais Aruba.