“E Curazon di nos FE ta e Pasion, Morto y Resureccion di nos Señor Hesus Cristo”

Pader Jose Miguel Nava:

ORANJESTAD (AAN) – “E berdad ta cu meymey di nos realidad como Cristian, e curazon di nos FE ta e Pasion, Morto y Resureccion di nos Señor Hesus Cristo”, ta palabranan di Pader Jose Miguel Nava, Hefe y Guia Spiritual di Instituto Kateketico Aruba (IKDA), den cuadro di nos Siman Santo aki.

“Y un realidad importante ta cu no solamente nos mester sa di Dios, nos mester sinti Dios, y e oportunidad aki di dramatiza e Pasion y Morto di Cristo Hesus, ta duna oportunidad pa e hobennan por realiza e importancia di e Sacrificio di Amor, cu Dios a haci, pa medio di su Yiu Jesus Cristo”, Pader Nava a expresa.

Amor pa cada un di nos, y esey ta locual e kier pa nos muchanan biba na e momentonan aki y durante tur e tempo di Cuaresma, unda tabata tin diferente tipo di Caminda di Cruz, den e scolnan di SKOA unda ta desaroyando e oportunidad aki den e muchanan mas chikito, Kleuter, scol basico, pero tambe den MAVO.

E Sacerdote a bisa, cu e ta sinti cu scolnan catolico ta mas activo y den e tema aki specialmente, pasobra den tempo di Cuaresma, ta local cu nan ta reuni pa reza e Caminda di Cruz. “Loke nos ta haci ta yuda nan dramatiza. E ta un metodo nobo pa nan por realiza e importancia di e Sacrificio di Cristo Hesus”, Pader Nava a comenta.

Pader Nava a splica e nificacion di e Cruz. “Si nos ta mira e Cruz, tin dos palo. Un ta mustra e realidad di Dios, cu kier ta pa medio di su yiu. Humanidad hunto cu Dios, pero na mesun tempo su brazanan ta mustra cu e kier trece unidad pa medio di unidad. Si un famia kier permanec’e uni mester di e forza di e Cruz. Mester reconoc’e pa medio di Cristo Hesus, e modelo di amor, di entrega y unidad. Ta importante pa e tempo aki e famia por sinta hunto, por reuni, por interioriza. Por wak’e den su interior, con ta su comportacion, pasobra nos tur ta hende pecador”, Pader Nava a expresa.

El a agrega cu nos tur tin debilidadnan; nos tur mester traha riba nos, pa por bira e miho version di nos mes, specialmente den e nucleo di nos famia.