‘MENtalk Conference’ tabata uno impactante, real y necesario pa homber na Aruba

ORANJESTAD (AAN): Durante siman den oranan di anochi, a marca un momento historico pa bienestar mental di homber na e isla.

MENtalk, organiza pa Fundacion FADA den colaboracion cu Piso Tres, en conexion cu Dia Internacional di Hende Homber, a reuni un sala yen di homber dispuesto pa siña, pa papia, pa enfrenta realidadnan cu hopi biaha ta keda den silencio.

   Durante e evento, Tarrick Ras a fungi como MC, Johnny Boekhoudt como moderador di e “Real Talk” 1-on-1 sessions, y aki 3 invitado special, Jerusho Fernandez, Darral Erasmus y Danchelo Picus a worde invita pa subi riba podium pa combersa den un forma directo y sin filtro. Tur cu su propio lucha, a mustra curashi pa papia abiertamente tocante nan pasado, nan dolor y con nan a bira nan dolor den un proposito.

   Un standout absoluto tabata e keynote speaker Marcelino Mauricio, cu a trece un energia unico den e sala. Pone tur hende para keto. Marcelino a recorda tur hende un berdad essencial: “Nos ta ser humano prome cu nos ta homber, tata, yiu, pareha, trahador.”

   Ta ok pa sinti: A papia riba topiconan di emocion te na hermandad, di salud mental te practica breathwork, di paternidad te sanashon. E anochi a duna tur homber hermientanan cu por yuda nan navega bida ora e mundo ta bira fuerte. Hermentnan pa sinta cu bo pensamentonan, pa respira den bo tormenta, y pa papia honesto! Prome cu bo mes, despues cu un persona cu bo ta confia. Pasobra un bon amigo, un partner, un ruman of mentor di confianza por yuda bo carga e peso of cambia perspectiva ora mas bo tin mester di dje.

   No ta importa con duro bo cay. Con kibra, perdi of cansa bo ta. Bo semper por subi bek.  Kere den bo propositoy haci bo mes e pregunta tur dia: “E manera cu mi ta pensa y papia ta den acuerdo cu kico mi ta sinti paden?” Laga esey ta bo meta.

   Durante anochi tabatin hopi raffle gifts tambe. Giftcards for di top barbers, carwash giftcards, free intake sessions cu psicologonan, toolboxes y hopi mas, tur pensado pa stimula homber pa cuida di nan bienestar den manera integral. Un manera poderoso pa celebra Dia Internacional di Homber.

   Fada conhunto cu Piso Tres no por warda pa e siguiente edicion di MENtalk y kier gradici tur persona y compania cu a inverti den na bienestar mental.