ORANJESTAD (AAN) Diego de Cuba, Presidente di Sindicato STA, den entrevista cu DIARIO ta sigui splica cu como consecuencia di e salario miyonario cu e CEO nobo di Aeropuerto ta bay gana,
gobierno ta bay haya su mes cu otro NVnan tambe lo bay pidi un excepcion pa hendenan cu nan tin di busca.
“Pero esey no ta e problema. E problema ta cu nos tin Schiphol Groep aki riba, si mi no ta ekivoca for di aña 2001. Anto, un di nan tareanan tabata pa nan ‘line up’ un yiu di tera pa bay ocupa e puesto di CEO na Aeropuerto di Aruba. Y mi por bisa cu aworaki nos tin yiunan di tera cu por cumpli cu tur e tareanan aki. Nos tin! Pero, lamentablemente, bo tin Schiphol Groep eynan cu, den mi concepto, personalmente y como dirigente di Sindicato STA, mi no ta compronde pakico nan tin Grupo Schiphol akinan”, Diego de Cuba a señala.
De Cuba a bisa cu e ta corda ora cu Schiphol Groep a bin e prome director cu nan a manda tabata Jan Ringeling, y e tabata tin e opdracht di kita hende for di trabao pa bin cu un reorganizacion e temporada eynan, y el a bisa nan “sorry, e no tin curazon pa haci e cos aki”.
Despues nan a manda un burdugo cu si a kita 82 hende for di trabao. “Mi ta corda cla, cla e temporada ey cu 82 yiu di tera profesional, mama y tata di famia, a bay cas”, Diego de Cuba a remarca.
