Destruccion di imagen di Mama Maria na Santa Cruz a causa impacto - *Ehempel di agresividad di figuranan publico ta wordo sigui - *Balornan di tolerancia y respet ta parti di e herencia di e Arubiano
ORANJESTAD (AAN) — E destruccion di e Imagen di Mama Maria na Santa Cruz, a causa un impacto grandi na Aruba ayera. Cu lagrima na wowo, devotonan a expresa nan mes di loke a pasa y loke no por wordo acepta sin mas ya cu e suceso ta mishi directamente contra e balornan sagrado di tolerancia y respet cu ta parti di e herencia cultural di e Arubiano.
Den historia di Aruba, e devocion di Mama Maria a hunga un papel importante.
Bishitante di tur religion ta acudi na e Kapel di Alto Vista, cu ta wordo directamente mara na e historia di Aruba, cu a habri porta pa hende di tur rasa, religion y origen bira parti di un comunidad cu den su Himno ta confirma Arubianismo cu ta motibo cu bishitantenan ta sinti nan mes na cas na Aruba.
Si ayera Aruba a biba cu e impacto di e suceso na Santa Cruz, pa hopi Arubiano loke a pasa ta algo cu por a wordo spera cu un aumento drastico di actitud violento y agresivo, hunto cu falta di respet y tolerancia pa otro cu ta wordo fomenta dor di personanan cu mester ta ehempel pa comunidad.
Mas y mas por tuma nota di actitudnan completamente contra loke mester considera como respet pa otro.
Arubianismo ta basa riba un trato trankil y respetuoso di otro hende y ta completamente contrario na e forma agresivo, cu ta bay contra educacion basico den cas Arubano.
E loke a pasa na Santa Cruz segun cantidad di Arubiano preocupa, ta indica cu e moral halto di Aruba ta wordo afecta.
Hende no ta respeta nan mes ni otro mas, a wordo trece dilanti den comentarionan ricibi di Arubianonan sumamente preocupa cu e tendencianan nobo na Aruba.
Atakenan bou di tur nivel, e forma cu hende ta impone nan mes riba otro, ta causante di hopi preocupacion.
Un mensahe completamente contra e pensamento y base Arubano ta wordo entrega na muchanan cu lo tin problema creciente pa comprende kico ta nifica hasta comportacion basico aceptabel.
E destruccion di e Imagen historico di Mama Maria na Santa Cruz, sigur mester di atencion di tur hende pasobra e ta prueba di un peligro sumamente grandi pa comunidad y entrega di balornan peligroso na generacionnan nobo, cu mas y mas ta tuma nota di balornan asina importante pa Aruba cu ta bay perdi.
E forma cu hende ta papia y atende cu otro, ta contra tur moral Arubano. E ehempel cu personanan cu ta desplega un papel publico ta atende cu otro, ta base pa loke ta pasa awe ora ta destrui un imagen di devocion sin ningun motibo.
E caso riba su mes ta bou di investigacion pero pa cantidad di Arubiano atrobe prueba a wordo entrega cu e moral, a pakete di balor di e Arubano, ta na peliger cu actonan cu ta demostra cu algo sumamente serio a pasa cu educacion cu ta cuminsa cu e ehempel cu ta wordo duna na publico door di personanan cu mester ta ehempel pa e comunidad decente di Aruba!
