ORANJESTAD (AAN): Un famia di 60+ cu ta biba na Pos Chikito, a indica na DIARIO cu nan ta sinti cu desde Diabierna caba, esnan encarga cu cobranza na WEB Aruba NV “a lanta loco”.
Nan ta mira cu personal di WEB ta druk bezig ta kitando meternan pa loco rond.
Y nan a kita meter tambe di un famia di 60+, kendenan pa prome biaha den nan bida a lubida di paga un di e cobranzanan.
“Nos tin 4 meter na nos cas, como cu nos tin tin 2 bijbouw,” e ciudadano a indica na DIARIO.
E famia tin trabao pues pago no ta problema. Pero pa un ekibocacion, e señora a lubida di paga 1 di e meternan. Y net esey ta e meter cu ta conecta nan cas!
“Esnan di WEB Aruba NV a yega den weekend, y aunke esaki ta prome biaha cu e ta pasa cu nos, nan a djis desconecta meter y bay cu tur cos,” e habitante a declara den un entrevista cu DIARIO.
El a tende cu semper e modus operandi di WEB Aruba NV tabata pa esnan cu keda sin paga e cobranza, e trahador di WEB ta djis yega, cera cranchi di meter y laga un nota cu bo tin debe atraza.
“Pero esey no a pasa cu nos! Nan a djis yega y bay cu full e meter,” e ciudadano a indica tiki indigna. Nan no ta ningun clase di ‘repeat offender’, pues semper nan ta paga na ora! Pesey loke a pasa awor den weekend ta algo cu nan no ta acepta. Tur otro 3 meter a wordo paga, y pa ekibocacion a laga uno afo sin paga.
“Di con e personal encarga cu cobranza na WEB Aruba NV, no a ripara cu un meter a keda sin paga, di con no ta coy telefon y avisa nos cu a lubida di paga un meter?”
Loke mas ta indigna e ciudadano, ta cu awa ta un di e elementonan esencial pa bida humano. Pues pa un compania corta meter completo, den su concepto nan ta violando derecho humano di e ciudadanonan ey.
E ta disgusta cu a bay na e medida extremo di kita e meter y bay cune.
“Esaki a socede prome biaha den nos historia aki bibando na Pos Chikito, y net cu un famia di 60+. Mas bien un ‘warning’ tabata na su lugar, y no yega y dal un medida maximo.
Nan a core bay paga mesora ora a ripara cu a lubida di paga e meter. Pero riba Dialuna nan a keda mira esnan di WEB Aruba NV ta core rond, pues tin mas hende cu problema cu cancelacion di awa den Pos Chikito.
E ta spera cu WEB Aruba NV ta mas cauteloso. Pa comete eror ta aceptable y humano, pero envez di djis kita meter mesora, tene piedad cu esnan cu ta comete ‘first offense’ y djis duna advertencia cerando cranchi.
E potret aki ta uno di archivo.
