ORANJESTAD (AAN): E corant ‘Clarin’ na Argentina, a publica Dialuna un relato basta extenso con e isla di Aruba ta casi yegando na logra e punto di “herd-immunity”.
Como cu casi 70 porciento di e poblacion ta vacuna cu por lo menos un dosis di Pfizer.
Den pleno pandemia di Coronavirus, mientras cu algun pais ya a pasa den di dos y di tercer ola, awor hopi ta tratando di mitiga e contagio di e variante Delta. Mescos cu na Argentina cu awor tin medida nobo pa tur pasahero cu ta yegando, y tambe tratando di acelera vacunacion di ciudadanonan.
Pesey mes, segun e corant Clarin, ora cu un destinacion turistico ta apunto di logra e tan anhela ‘herd-immunity’, esey ta un bon noticia. Y e mihor ta si e destinacion turistico aki ta den Caribe, cu ta ofrece tur comodidad di un infrastructura turistico, cu e beyeza natural di su beachnan.
E corant di Argentina a skirbi cu Aruba ta rumbo pa e ‘herd-immunity’ como cu casi 70 porciento di su poblacion a wordo vacuna por lo menos cu un dosis di Pfizer.
E cantidad di personanan registra y vacuna ta subi tur dia. Awor ya e ta na 66.587 habitante, cu ta 68% di e poblacion riba di 18 aña cu a ricibi por lo menos un dosis di Pfizer Bio-NTech. Tambe e corant a menciona cu e isla a habri caminda pa cuminza vacuna hobennan di 12 te cu 15 aña cu tin malesa.
Tambe e casonan di Covid-19 na e isla ta hopi bon controla, danki na e medida- y protocolnan cu a wordo tuma for di comienzo di e pandemia. E corant a menciona tambe cu debi na e avance di vacunamento di habitantenan, ya caba na Aruba e uso di tapaboca no ta obligatorio mas.
E corant despues a skirbi un tiki di Aruba, pa splica unda e ta situa, y tambe cu Eagle Beach na Aruba a haya premio di un di e top beachnan na mundo.
