ORANJESTAD (AAN): Diamars atardi, Sindicato FTA tabata un di e ‘stakeholders’ cu a reuni cu Formador di Gobierno, den cuadro di formamento di Gabinete Wever-Croes II.
Segun Hubert Dirksz di FTA, e reunion cu formador tabata hopi eficiente, cortico, pero di nan banda a bay basta detaya cu a cubri tur punto. Uno di nan, fuera di e asina yama Landspakket cu tin riba mesa, nan tin e asina yama Punto Principal cu pa FTA ta crucial ta e flexibilizacion di ley laboral.
Simplemente bisa, Sindicato FTA ta para contra e flexibilizacion di ley laboral. Esey no kiermeen cu nan no ta kere den dialogo, pa nos para hunto den e caso aki pa atende e problemanan.
Dirksz a indica cu den reunion cu Formador, nan a tackle tur e puntonan y a concentra hopi riba situacion social, mirando cu e situacion social na Aruba ta basta serio, pero nan como organizacion sa tambe cu situacion financiero di pais Aruba cu e ta pasando aden ta rekeri un progreso economico. Relaciona cu e progreso economico, nan sa cu e lo bay touch e trahador. Pero tin di corda cu sin trahador no tin economia. Sin inversion tampoco no tin. Sin productividad no tin bon economia y no tin cliente. Den e caso aki Aruba ta depende di turismo como unico pilar, y sigur tin di cuida esey, e ta vulnerable y pueblo tin di paga bon tino riba producto turistico, pa sa con ta bay crece economicamente y con Aruba ta sali di e situacion dificil cu e tin.
Dirksz di FTA a admiti cu Aruba tin un situacion social cu ta basta complica, y esey ta relaciona tambe cu situacion cu husticia y criminalidad y otro situacionnan, manera cu ta afecta economia, salud di hende, y tambe medio ambiente.
Parti mas grandi pa Sindicato FTA ta cu dirigentenan sa cu situacion cu Aruba ta aden no ta facil. Den e caso aki, bo tin un responsabilidad grandi riba gobernantenan y parlamento cu tin e tarea pa yuda e isla sali di e situacion aki satisfactoriamente cu nos sa lo no tuma lugar den par di dia, sino par di aña.
Hubert Dirksz a mustra cu pa saca e isla di e situacion, e participacion di gremio y sindicatonan ta importante. FTA ta un Sindicato cu ta representa tanto trahadornan publico y tambe di sector priva.
Den e parti di sector priva, Sindicato FTA a bisa cu nan grupo priva mayoria parti ta esnan cu ta traha den sector hotelero. E ta e unico pilar cu ta nos turismo, y nos mester cuida esaki.
“Pero esaki no mester nifica cu tin di bay tuma medidanan cu na final ta afecta e trahador y su famia,” e president di FTA a indica. “Nos ta kere su cu medidanan por wordo tuma, pero net lo contrario, pa yuda e situacion y aumenta productividad, Pero no pa lag’e afecta e situacion social di e trahador.”
FTA a bisa cu pronto tin di bay cambia e sistema di impuesto, y nan tin situacionnan cu ta hopi liga na reto. Segun Dirksz, hopi di e retonan aki ta situacion cu a presenta prome cu crisis di pandemia, pero awor tin di atende esaki cu Hulanda pero cu un trabao inmenso localmente cu tin di wordo atendi pa nos hendenan, sperando cu Sindicatonan lo haya participacion manera nan ta desea y spera.
