Representacion di Pueblo ta trata y dicidi riba gasto y entrada di Aruba na 2021 - *Riba mesa lo tin e base financiero di e maneho cu ta wordo hiba pa e pais - *Nivel di trabou pa cual Pueblo ta paga no ta permiti ni spirito ni bati bleki
ORANJESTAD(AAN)—Diabierna e constelacion nobo di Parlamento di Aruba lo reuni pa asina trata e presupuesto 2021 di Aruba. Esaki ta nifica cu e constelacion nobo di Parlamento di Aruba, mester debati pa finalmente bay di acuerdo of rechasa e cifranan cu a wordo prepara pa Aruba pa 2021.
E cifranan aki mester a wordo trata for di fin di 2020 cu a bira e aña cu mester a adapta tur cifra di Aruba debi na e pandemia. E prome resultado tabata, cu e presupuesto cu lo a bira e prome compilacion di cifra di Aruba den cual e gastonan no tabata surpasa entrada, mester a contene cambio cu tambe mester a wordo haci pa 2021.
Diabierna Parlamento di Aruba mester entrega su mes na uno di e tareanan mas importante cu Pueblo a pone den su man cu ta e vigilancia di placa di Pueblo di Aruba.
Pa DIARIO Diabierna lo bira e dia pa midi e calidad di Parlamento cu Aruba tin na e momentonan aki y e loke por spera di cada Miembro di Parlamento cu a hura cu e lo busca bienestar di Aruba.
E hecho cu DIARIO sigur lo presta atencion na tur detaye den e forma cu e reunion lo bay y con Parlamento ta atende cu cifranan di Pueblo, ta directamente basa riba loke den historia a pasa cu placa di Pueblo.
Ta pa motibo cu e miembronan di Parlamento entre 2009 y 2017 a trapa cu dos pia riba nan trabou como representante di Pueblo y contra e Ley di Contabilidad, nan por a entrega Gobierno Mike Eman e 1.6 Miljard di Pueblo sin ningun control loke a sink Aruba.
Ta pasobra mayoria di Parlamento cu a sostene Gobierno Mike Eman entre 2009 y 2017 a permiti, Gobierno Mike Eman por a trapa cu dos pia riba Ley di Contabilidad y bay firma un acuerdo contra interes di Aruba cu Nicolas Maduro y pa colmo kibra tur ley ora Gobierno Mike Eman a dicidi cu e no ta permiti Miembronan di Parlamento mira loke el a regla tras di nan lomba cu Nicolas Maduro.
Ta a base di loke ta bini den rapportnan di Algemene Rekenkamer Aruba, e instancia mas halto di control financiero di Aruba, Diabierna DIARIO lo ta atento na loke ta pasa den Parlamento di Aruba, cu actualmente ta conta cu 20 miembro pasobra e miembro eligi Benny Sevinger, ta den detencion preventivo.
Un periodo nobo ta cuminsa pa Aruba cu a wordo herida seriamente dor di abuso politico cu durante e periodo di Gobernacion di Mike Eman, no a wordo frena dor di e mayoria den Parlamento cu a sostene Mike Eman.
Un periodo den cual nos lo expone tur wega barata, tur acto ilegal manera e falsificacion di voto cu Wyatt Ras di e fraccion di AVP a permiti durante e prome reunion di Parlamento ora mester a eligi un Presidente.
Cu Ley di Contabilidad den man, DIARIO lo vigila bienestar di Aruba cu ta cuminsa cu e trabou cu ta wordo haci dor di miembronan di Parlamento cu ta wordo paga dor di Pueblo di Aruba pa traha pa e pais y no pa nan eleva nan mes!
Cu Ley den man DIARIO lo sigui tur reunion y lo informa Aruba pa asina sigui cana den un futuro nobo cu Aruba merece!
