Relacionista Publico di Brandweer Aruba, señor Francis Toussaint:
ORANJESTAD (AAN): Relacionista Publico di Brandweer Aruba, señor Francis Toussaint, ta enfatisa cu medidanan di siguridad na cas ta esencial pa preveni candela y desgracia. Un momento di negligencia por causa daño grandi. Preveni semper ta miho cu laga situacionnan sali for di control. Proteha bo famia, bo cas y bo futuro cu responsabilidad tur dia.
Den un entrevista cu DIARIO, el a comparti un lista cortico di medidanan preventivo cu mester tuma pa evita tragedianan lamentabel. Entre otro, ta importante pa tin ‘smoke detector’ den cas. E aparato aki ta diseña pa alerta habitantenan na tempo, specialmente ora nan ta drumi, pa nan por sali for di cas na tempo y avisa Brandweer.
Segun Toussaint, mester instala ‘smoke detector’ den cada camber, no solamente den cushina. Si candela cuminsa den un camber sin detector, huma por yena e espacio prome cu e señal yega na otro parti di cas, cu por tin consecuencianan fatal.
Tambe ta esencial pa tin aparatonan pa paga candela. Ta consehabel pa pone esaki cerca di frigidair y no banda di stoof. Un plan di escape pa tur habitante di cas ta igual di importante, manera tambe pa sa cu 911 ta e number di emergencia na Aruba, y cu esaki mester wordo uza exclusivamente pa situacionnan serio.
Riba e topico aki, Toussaint ta haci un yamada serio na mayornan pa supervisa muchanan chikito cu celular cu tin beltegoed, pasobra yamadanan falso na 911 por stroba e trabou di emergencia y pone bida den peliger. Ademas, tur habitante—incluyendo hende cu ta traha of cuida na cas—mester sa e adres exacto di e cas y tin un number di contacto disponibel.
Siguridad no ta un opcion, pero un obligacion di henter comunidad. Cada paso preventivo cu nos tuma, ta haci e diferencia entre un susto y un tragedia. Actua cu consciencia, prepara cu sabiduria, y laga siguridad bira parti di bo bida tur dia.
