Minister Wever:
ORANJESTAD (AAN): Den cuadro di Dia di Prensa na Aruba, Minister di Asunto Economico, Comunicacion y Desaroyo Sostenibel, Geoffrey Wever a expresa cu media su rol ta di informa comunidad, pero den e mesun rosea ey tin un rol tambe pa controla cu e informacion ta corecto y fidedigno.
El a agrega cu esey ta algo hopi importante y e bunitesa di biba den un pais liber y democratico manera Aruba caminda cu prensa ta liber pa haci su trabao y no ta wordo stroba pa haci esey.
Tin hopi pais cu no conoce media liber y Aruba si tin esey. E ta algo cu mester balora y proteha, a remarca.
Pa loke ta e reglanan di prensa liber, hopi a wordo skirbi den pasado door di ilustrenan cu ta domina e materia. Tin e tratadonan internacional, di Nacionnan Uni cu ta stipula cu tin derecho di prensa liber. Esaki ta derechonan cu ta ancra tambe den e ordenansa di derecho di e pais.
Gobierno ta para su tras y esey ta e libertad di prensa. Den e contexto aki e limite ta entre e libertad di prensa y e ambito personal. Eynan tin diferente hurisprudencia local y internacional riba unda e 'grens' ey ta, a splica.
E mandatario ta kere cu esey ta un 'grens' cu mester respeta y esaki ta estableci door di hurisprudencia caba.
