Otmar Oduber, lider Plataforma Pais a declara:
*Mas pabao por mira e desaster di dump cu ta wordo crea!
ORANJESTAD (AAN) — Otmar Oduber, lider di Plataforma Nos Pais, a sigui elabora tocante e situacion di Seri Teishi, den conferencia di prensa cu a tuma lugar recientemente, eynan mes.
Oduber a subraya cu Seri Teishi, cu ta suppose tabata un solucion den e rapport di PAHO, pa dos of maximo tres aña, estudionan cu a wordo haci a indica cu e buraco y cobamento cu a tuma lugar, por a yega te na tanto ton di sushi cu por wordo hinca.
“Nos ta tres aña den overtime, wak e resultado awe. Seri Teishi ta mas halto cu e tabata antes; Seri Teishi ta yegando na mesun nivel cu dump, patras aya, na 22 meter riba e nivel di awa, y si bo weita un tiki mas pabao bo ta mira e desaster di dump cu ta bezig ta wordo crea na e momentonan aki, unda sushi ta wordo poni riba un sero cu tur e consecuencianan pa loke ta trata salud di hende, pa holo den tur e bario aki, y e desaster cu ta wordo crea aki na Aruba, simpel y yanamente pasobra no tin e curashi den e gobierno pa minister di naturaleza”, segun Otmar Oduber.
El a señala cu e minister aki a yega y haya tur cos cla, un ley cla pa Serlimar unda cu gobierno di Aruba no mester a paga mas e 27 miyon florin cu ta wordo pasa pa e compania aki, pasobra den e ley aki a regla cu tur hende den e comunidad di Aruba den su totalidad, mescos cu na cualkier parti di mundo, tin cu paga pa recogemento di sushi.
“Awe na Serlimar nada ta pasando, Serlimar ta gewoon status quo, nos a perhudica un cantidad di comerciante na Aruba, ora cu un mentira a wordo lanza door di e minister anterior señora Marisol Lopez-Tromp, den e caso aki, hunto cu esnan cu tabata dirigi Serlimar y e abogado cu a gana un monton di placa, durante tres aña, supuestamente como un curator. El a termina su trabao, a perhudica comerciantenan, y Serlimar NUNCA tabata al borde di bancarota”, Otmar Oduber a enfatiza.
El a agrega cu Serlimar, simplemente, a wordo perhudica door di gobiernonan durante e ultimo 15 pa 20 añanan aki, cu no a traspasa 70 miyon florin cu nan a priminti e compania, cu el a hinca den su presupuesto, nan no a pase y esey ta e problema cu Serlimar tin, te dia di awe!
